Juventusi dhe Lacio rikthehen të luajnë përsëri pas dy sezonesh në finalen e Kupës së Italisë. Dy vite më parë, në 2015-n, ishte Juventusi që fitonte 2-1; mbetet për t’u parë se në duart e kujt do të përfundojë trofeu këtë mbrëmje.
Finalja do të zhvillohet në “Olimpico” të Romës, çka i jep njëfarë epërsie Lacios për t’iu kthyer fitimit të këtij aktiviteti pas katër sezonesh.
Pasi është pranë suksesit në kampionatin italian, e po ashtu do të luajë në finalen e Kupës së Italisë dhe në atë të Champions League-s, Juventusi synon një fitore të trefishtë, që do duhet të nisë nga sonte.
Torinezët janë fituesit e dy sezoneve të fundit të Kupës së Italisë, por humbja të dielën ndaj Romës në të njëjtin stadium, në një ndeshje të vlefshme për Serinë A, nuk është një fakt në favor të tyre.
Juventusi eliminoi Napolin në gjysmëfinale, duke e fituar 3-1 takimin e parë dhe duke e humbur të dytin 3-2.
Formacioni i mundshëm i Juventusit në finalen e kësaj mbrëmjeje është ky: Neto, Barzagli, Bonucci, Chiellini, Alex Sandro, Marchisio, Rincon, Dani Alves, Dybala, Mandzukic, Higuain.
Lacio ka eliminuar në gjysmëfinale kundërshtarin më të egër të saj, Romën, me një fitore 2-0 dhe me një humbje 3-2.
Për të në fushë pritet të jetë kjo njëmbëdhjetëshe: Strakosha, Bastos, De Vrij, Wallace, Basta, Milinkovic-Savic, Biglia, Parolo, Lulic, Immobile, Keita.
Finalja do të nisë në 21:00. /tesheshi.com/
