Shqiptarët nga viti në vit po rrisin besimin e tyre te Policia e Shtetit, edhe pse mendojnë se personat më të korruptuar janë ata që punojnë në kupolën drejtuese të këtij sektori.
Këto janë të dhënat e një sondazhi të realizuar nga Instituti për Demokraci dhe Ndërmjetësim, i titulluar “opinioni i qytetarëve për forcat e policisë”, që përfshiu Shqipërinë, Bosnjen, Malin e Zi, Kosovën, Maqedoninë dhe Serbinë.
Pyetësori kishte gjashtë grupe pyetjesh:
Niveli i besimit të qytetarëve tek institucionet;
Perceptimi për policinë si institucion, por edhe për oficerët dhe oficeret e policisë si individë;
Perceptimi për korrupsionin në shoqëri dhe në forcat e policisë;
Opinioni i qytetarëve për luftën kundër korrupsionit;
Opinioni i qytetarëve për punën e organizatave të shoqërisë civile;
Të dhëna demografike.
Në përfundim të raportit me 1 mijë të intervistuar doli se dy të tretat (61%) e publikut thonë se i besojnë policisë.
Femrat tregojnë një besim më të madh tek policia (63%) në krahasim me meshkujt (59%). Të intervistuarit në qytete i besojnë policisë më pak se ata të zonave rurale.
Njerëzit mbi 45 vjeç kanë besim më të madh në polici dhe të anketuarit me nivel më të ulët arsimor kanë më shumë besim te policia.
Pak më shumë se gjysma e popullsisë (52%) besojnë se korrupsioni në forcat e policisë është shumë i përhapur në krahasim me 62% të vitit të kaluar.
Qytetarët ende janë të mendimit se politikanët kanë një ndikim shumë të madh në punën e policisë.
Shumica dërrmuese (69%) besojnë se politikanët ndikojnë plotësisht ose në një farë mase në punën operative të policisë, ndërsa 25% mendojnë të kundërtën.
Institucionet më të korruptuara vazhdojnë të jenë gjykatat (70%), Parlamenti (68%), prokuroria (67%), doganat (66%) dhe shëndetësia (61%).
Brenda radhëve të policisë, vetëm bashkëpunëtorët më të afërt të ministrit kanë dalë me rezultat “negativ”, që tregon se korrupsioni është shumë i përhapur (52%).
Për të gjitha njësitë e tjera të policisë, të anketuarit besojnë se korrupsioni në përgjithësi “nuk është i përhapur.”
Më shumë se gjysma e shqiptarëve (54%) ishin të gatshëm të denonconin rastet e korrupsionit të policisë. Kjo shifër përbën një përmirësim në krahasim me vitin e kaluar kur vetëm 47% ishin të gatshëm të denonconin nëse do t’u kërkohej të bënin të ditura të dhënat e tyre personale. /tesheshi.com/
