Publikohet sondazhi i tretë i institutit Piepoli për zgjedhjet e 21 qershorit. Sipas këtij sondazhi, kandidati i mazhorancës, Erjon Veliaj mbetet në të njëjtat kuota të vlerësimit të publikut me 53.5%, kandidati i opozitës, Halim Kosova arrin në kuotën e 34.5%, kandidati i pavarur Gjergj Bojaxhi, ka 8.5% të përkrahjes, Sazan Guri me 2.5% dhe Arben Tafaj, me 1.5%.
Sondazhi i transmetuar në televizionin A1 Report, theksonte se nëse qytetarët do të shprehnin sot vullnetin e tyre më votë, sipas sondazhit të institutit italian Piepoli, kandidati i së majtës Erion Veliaj do të shpallej fitues i Bashkisë së Tiranës. 53.5 % e të anketuarve kanë votuar pro Veliaj si kryebashkiak, ndërsa pas tij me 34.5 % radhitet kandidati i së djathtës Halim Kosova, një diferencë mes tyre prej 19 %. 8 % kanë votuar për të pavarurin Gjergj Bojaxhi, 2.5 % për Sazan Gurin dhe 1.5 % për Arben Tafajn, gjithashtu kandidat i pavarur.
Krahasuar rezultateve të sondazhit të dytë të kryer më 28 Maj, vlerësimi për Veliaj si fitues të garës elektorale të 21 qershorit nuk ka ndryshuar. Ndërsa për Halim Kosovën, ndonëse sipas sondazhit nuk shpallet fitues, vlerësimi për të është rritur me 0.5 %
Performanca e Bashës
Sipas sondazhit të Piepoli, puna e kryebashkiakut Lulzim Basha, si kryebashkiak i Tiranës në këtë sondazh përmbyllës ka pësuar një farë rritje, ku nga 23 % në sondazhin e dytë të Piepolit, ka shkuar në 24 %. Pra vlerësimi i mirë për punën e tij 4-vjeçare në krye të bashkisë është rritur me 1 %. Në sinkron me këtë vlerësim është edhe numri i personave që e vlerësojnë dobët punën e tij, pra ka rënë me 5 %.
Rezultati në rang kombëtar
Nëse zgjedhjet në rang kombëtar do të bëheshin sot, koalicioni i majtë do të merrte fitoren. Kështu kanë menduar 60 % e të anketuarve, një vlerësim ky i pandryshuar nga sondazhi i dytë i 28 majit të kryer po nga Instituti i Piepolit. Referuar sondazhit të parë më 15 maj fitorja e koalicionit të majtë është vlerësuar me 1.5 % më shumë. Bie në sy se në krahasim me zgjedhjet e përgjithshme të 2013-ës ku aleanca e majtë fitoi me 59.3 %, nëse këto zgjedhje do të përsëriteshin në 2015, koalicioni do të fitonte me 0.7 % më shumë.
Ndërsa koalicioni i djathtë ka pësuar rënie me 0.5 % krahasuar me dy sondazhet e para. Vetë PD-ja ka pësuar rritje me 0.5 %, por ajo që e penalizon është Partia Republikane e aleatit Fatmir Mediu, e cila sipas të anketuarve në sondazhin e tretë ka zbritur me 0.5%
Liderët
Besimi në liderin shqiptar. Në këtë pyetje të sondazhit të Institutit Italian Piepoli vlerësimin më të lartë e merr Kryeministri Edi Rama ( 62 %), pas tij aleati në qeverisje Ilir Meta (40%), më tej kryedemokrati Lulzim Basha (36 %) e së fundi lideri historik i Partisë Demokratike Sali Berisha (30 %), me një diferencë shumë të ngushtë me liderin e opozitës.
Ajo që bie në sy nga detajet e këtij sondazhi siç janë mosha dhe profesioni, është se kryeministri Rama ka marrë vlerësime të mira për punën e tij me 48 % në anketues që jetojnë në fshat, dhe 44 % nga qyteti. Po ashtu, kategoritë që e kanë vlerësuar më shumë qeverisjen e shefit të mazhorancës Rama, janë ajo e studentëve me 70% dhe pensionistët me 66 %. Sipas analistëve në studion e A1 Report kjo lidhet edhe me faktin e reformave të ndjekura për këtë shtresë të shoqërisë nga ish-ministri i Mirëqenies Sociale dhe Rinisë Erion Veliaj, tashmë kandidat i së majtës për Bashkinë e Tiranës.
Ndërkohë kategoria që ka shprehur vlerësimin “dobët” për kryeministrin Rama është ajo e personave që banojnë në qytet me 40 %, ndryshe nga fshati ku ka marrë vetëm 23 % për vlerësim negativ.
25 % e të anketuarve nga Instituti italian Piepoli e kanë vlerësuar mirë punën e liderit të opozitës Lulzim Basha si kryetar i Partisë Demokratike, 27 % e tyre mjaftueshëm, 45 % dobët dhe 3 % nuk e di.
Duke ju referuar kategorisë së anketuesve që Basha ka marrë vlerësimet më pozitive, në radhë të parë shfaqen të rinjtë e moshës 18-24 vjeç dhe punonjësit me kohë të plotë. “Goditjen” Basha e ka marrë nga kategoria e moshës 25-34 vjeç ku 54 % e tyre e kanë vlerësuar të dobët punën e Bashës në udhëheqjen e opozitës, si dhe nga pensionistët 50 % e të cilëve kanë dhënë të njëjtin vlerësim.
