Sllovenia ngjitet në çatinë e Europës në Basketboll. Skuadra e udhëhequr nga ylli i NBA-së, Dragiç, ka fituar për herë të parë në histori, kampionatin europian në këtë sport, duke qenë njëkohësisht, edhe vendi i parë i ish-federatës Jugosllave, që kurorëzohet si më e mira në kontinentin e vjetër.
Në finalen “sllave” të luajtur të dielën në mbrëmje, sllovenët në dukje jo favoritë, kanë nxjerrë më të mirën nga vetja, duke mundur “taktikët” serbë, të cilët nuk arritën të mbulojnë siç duhet, Goran Dragic, autor i 35 pikëve dhe një ndeshjeje ku dha edhe shpirtin.
Deçizive për skuadrën që drejtohet nga serbi Kokoskov, ka qenë loja e lojtarëve “të dytë” më të rëndësishëm, si Prepeliç e Randolf, pasi një tjetër yll në rritje, 18 vjecari Donçiç, u dëmtua në kavilje.
Në këtë mënyrë Serbia sërish nuk arrin dot objektivin maksimal, edhe pse trajneri Xhorxheviç, u përpoq të krijojë një “mur” mbrojtjeje për Dragiç. Në fund të turneut, në podin më të lartë është ngjitur Slovenia “e vogël”, më pas Serbia dhe e treta Spanja, që mundi Rusinë për medaljen e bronztë.
Në fund të turenut, në formacionin më të mirë të Europianit, u zgjodhën Dragiç, Donciç të Sllovenisë, Bogdanoviç i Serbisë, Shved i Rusisë dhe Po Gasol i Spanjës. Veterani spanjoll, theu në këtë europian edhe rekordin e pikëve të shënuara në vite, duke arritur shifrën 1123 pikë, e duke qenë “mbreti” i pikëve në Europë. /tesheshi.com/
