Mbrëmë, nën patronazhin e Sekretariatit për implementimin e marrëveshjes së Ohrit, në Manastir është mbajtur manifestim kulturor për të kremtuar përvjetorin e alfabetit shqip. Në këtë manifestim kanë qenë prezent edhe dy studentët Blerona Brao, Arbër Arsllani dhe arsimtari i tyre Lebit Murtishi. Ngjarjen që ndodhi mbrëmë në Manastir, ku truprojat e Ali Ahmetit sulmuan Lebit Murtishin dhe dy studentët e tregon Blerona Brao, nëpërmjet një reagimi me shkrim.
‘Unë studentja Blerona Brao dhe kolegu im, gjithashtu student, Arbër Arsllani patëm fatin e mirë të marrim pjesë në përvjetorin e alfabetit të shkronjave shqipe në Manastir. Fati ynë u bë edhe më i madh kur në mesin tonë erdhi dhe u ul mësuesi ynë shpirtëror, Lebit Murtishi, i cili gjithë jetën ka ecur rrugës së shkronjave shqipe të cilave, u ka falur edhe një grusht gjak nga gjaku i tij. Çudia ndodhi, kur pas hapjes së programit solemn në skenën e dekoruar ku ishte vendosur orkestra filarmonike e RTSH nga e cila prisnim me padurim intonimin e Himnit Kombëtar, çuditërisht mbi të njëjtën skenë u shfaqën katër shkronja që përbënin emrin ABAZ. Dhe ky “ABAZI” na qenkësh Ali Ahmeti”,- shkruan Blerona.
Ajo shton më tej: “U tronditëm thellë kur në këtë përvjetor, që për ne të rinjtë ishte e para herë që merrnim pjesë në një manifestim të tillë, pamë se shkronjat e shenjta të alfabetit të lara nga dhjetëra breza me gjak të kulluar shqiptari, u mbuluan me një emër turk që po i shërben turpërisht armiqve të shkronjave shqipe, që vet këtij Manastiri të lashtë ia ka marrë të drejtën e të shkruarit Shqip.
Në çast, u ngrit në këmbë mësuesi ynë Lebit Murtishi, u nis drejt derës dhe në shenjë proteste dëgjuam këto fjalë:
“Turp të keni që edhe këtë datë të shenjtë po e njollosni me emrat tuaj të ndotur. Ky është manifestim i alfabetit dhe jo gradim i bandave të krimit!”
Pas tij, si me katapult u nisëm unë dhe Arbëri. Çudia u bë edhe më e madhe kur pas nesh u derdhën rreth njëzet banditë të Ali Ahmetit, na rrethuan në korridor me kërcënime më vulgare deri te kërcënimi me zhdukje fizike, të cilave ne u përgjigjëm sipas nivelit të tyre.
Duke parë gatishmërinë tonë për të dhënë jetën në manifestimin e shkronjave shqipe, njëri nga banditët, sigurisht kapobanda i të gjithëve, e pyeti mësuesin tonë se cili ishte ai që mori guximin të prishë manifestimin e “ABAZA-VE”.
Jam Lebit Murtishi tha mësuesi ynë, jam njeriu që në këtë qytet njëherë jam torturuar për vdekje nga banda të uniformuar, ndërsa sonte do isha më i lumtur të jap jetën prej jush që flisni “shqip”! Urdhëroni pra!”,- rrëfen ngjarjen studentja Brao.
Ajo shton se në atë moment kapobada ndërroi qëndrim dhe kërkoi që ata të largoheshin nga salla.
“Do ta mbajmë mend këtë datë të shënuar, manifestimin e së cilës e kishin organizuar bandat e armatosura të pushtetit të Gruevskit që po lufton me tërë qenien e tij kundër gjuhës dhe qenies shqiptare, njëkohësisht i bëjmë thirrje brezit tonë që kurrë të mos mashtrohen dhe kurrë të mos besojn se vrasësit e gjuhës shqipe do të bëjnë më shumë sesa bënë bandat e Ali Ahmetit me ne”,-përfundon reagimi i studentes Brao./tesheshi.com/
