Mësuesit e gjuhës shqipe në Mal të Zi, njohin shumë mirë gjuhën serbo-kroate, madje edhe ndonjë gjuhë tjetër të huaj, por jo shqipen, as me shkrim dhe as me gojë.
Dhe absurdi, është se në shumë shkolla pushteti i Podgoricës ka emëruar si arsimtarë të shqipes, persona që nuk i përkasin fare etnisë “kuqezi”.
Këtë alarm e ka lëshuar Këshilli Kombëtar i Shqiptarëve në Mal të Zi, i cili i ka dërguar një letër zyrtare ministrit të arsimit, Predrag Boshkoviq.
“Në disa shkolla shqipe në Mal të Zi japin mësim, mësimdhënës që nuk njohin gjuhën shqipe, ç’ka është në kundërshtim me Ligjin për Liritë dhe të Drejtat e Pakicave”, theksohet ndër të tjera në letër.
Me iniciativë të Komisionit për Arsim dhe Përdorim Zyrtar të Gjuhës shqipe të Këshillit Kombëtar të Shqiptarëve në Malin e Zi dhe me përkrahje të Kryetarit të KKSH-së, Genci Nimanbegu, në mbledhjen e mbajtur në Ulqin, KKSH kërkoi zbatimin e Nenit 13, paragrafit 4, të Ligjit mbi të drejtat dhe liritë e pakicave, me çka garantohet që “Mësimi të zhvillohet tërësisht në gjuhën e popujve pakicë dhe të bashkësive të tjera minoritare”.
Por në disa zona të vendit si në fshatra të Tuzit, Ulqinit por edhe në Krajë, shqipja thuajse nuk bëhet fare, ndërsa në shkresa shënohet si program i kryer.
Në këtë mënyrë shumë fëmijë të këtyre zonave nuk e njohin fare gramatikën shqip.
Muhamedi, një djalë nga Tivari që është me nënë shqiptare dhe baba boshnjak, i cili ka studiuar për turizëm, theksoi se në Tivar, shqipja po humb çdo ditë e më shumë dhe ai megjithëse 22 vjeç, fliste shumë pak shqip. “Nuk kam bërë kurrë gjuhë shqipe në shkollë, por në letër këtë lëndë e kam kryer dhe kam marrë edhe notë madje”, thotë ai.
/tesheshi.com/
