Kastriot Islami ishte një në nga hartuesit kryesor të sistemit zgjedhor proporcional rajonal që kemi sot në fuqi. Ai thotë se s’ka asnjë sistem perfekt, por ai u zgjodh si më i miri i mundshëm në kontekstin shqiptar. Duke folur para studentëve të UET-it, Islami refuzoi të përgjigjej nëse sot është penduar për zgjedhjen e këtij sistemi, i cili siç ka rezultuar ka fuqizuar shumë kryetarët e partive në bërjen e listave dhe solli dhe futjen në Kuvend të deputetëve me të shkuar kriminale.
Por ai zbulon një detaj interesant, se ky sistem nuk u zgjodh për t’i bërë gropën Ilir Metës dhe pse në atë kohë, në 2008-ën, PS-ja me LSI-në ishin kundërshtarë politikë dhe Meta u fut në grevë urie në Kuvend për të kundërshtuar marrëveshjen PS-PD për këtë reformë.
“Unë kam folur me Metën dhe i thashë se pragu 5 për qind që është lënë për të hyrë në Kuvend nuk të nxjerr ty jashtë loje; përkundrazi nëse ti e kalon këtë prag do të jesh king-maker. Ai më akuzoi atëherë, por realiteti tregoi që ai u bë king-makeri i qeverive të mëpasshme”, tha Islami.
Nga ana tjetër për protestën e ditës së shtunë ai tha se opozita proteston sepse ka humbur besimin se do të ketë zgjedhje të lira dhe të ndershme. “Mosbesimi ka arritur pikën më të ulët që mund të krahasohet vetëm me vitin ’96, në këto kushte opozitës i mbetën dy zgjidhje, ose të të bëhet fasadë në zgjedhjet e reja, ose të bëjë atë që do të ndodhë pas 18 shkurtit”, tha ish-politikani i lartë i PS-së, konvertuar në deputet të PD-së. Por i pyetur nëse me këtë nënkuptonte bojkot zgjedhjesh dhe marrje e pushtetit në rrugë, Islami tha “jo” për të dyja variantet. Ai theksoi se protesta e 18 Shkurtit synon të sensibilizojë qytetarët që kërkohen zgjedhje të lira dhe të ndershme dhe se PD-ja nuk do t’i bojkotojë zgjedhjet dhe as nuk synon marrjen e pushtetit në rrugë jo-institucionale. /tesheshi.com/
