Një numër i madh i armëve të vogla dhe të lehta janë shkatërruar nga policia e Kosovës. Kjo ngjarje rajonale e cila u zhvillua në“Metal Holding” në Ferizaj, u organizua nga Ministria e Punëve të Brendshme.
Me këtë ast zv. ministri në detyrë i MPB-së, Behar Selimi tha se ky është një aktivitet në të cilin Kosova përpiqet të jetë pjesë e iniciativave rajonale për më shumë siguri për qytetarët.
“Përgëzoj policinë dhe Prokurorinë në punën e madhe që e kanë bërë në muajt e kaluar në drejtim të realizimit të Strategjisë Nacionale për kontrollimin dhe grumbullimin e armëve të lehta dhe të vogla”, tha Selimi.
Ndërsa koordinatorja e programit të UNDP, Valbona Bogujevci, ka thënë se UNDP është e gatshme që të vazhdojë ndihmën dhe përkrahjen dhe të punojë ngushtë me palët e interesuara në adresimin e sfidave të ngjashme në të ardhmen. Ajo tha se posaçërisht në këto kohë që po jetojmë, armët e tilla dhe eksplozivët po bëhen gjithnjë e më shumë të zgjedhura për sulme terroriste.
Katerina Lopo, përfaqësuese e Bashkimit Evropian në Kosovë tha se strategjia e tyre për armët e vogla dhe të lehta identifikon Ballkanin Perëndimor, si prioritet kryesor dhe për këtë BE është e përkushtuar të përkrahë në mënyrë sistematike partnerët ë luftën kundër trafikimit të armëve.
Kurse zv. drejtori i përgjithshëm i policisë, Naim Rexha, tha se vazhdimisht punojnë në zhvillimin e kapaciteteve të saja për të pasur sa më shumë sukses në konfiskimin e armëve të jashtëligjshme.
Ai tha se policia do të jetë e përkushtuar të largojë mjetet e jashtëligjshme të dhunës nga duart e qytetarëve, sepse ky është element thelbësor që po i kontribuon rendit dhe ligjit dhe sigurisë publike në vend. /tesheshi.com/
