Nga Entjola Budo
Muaj pas proçkës lapërdhare të Shukri Xhelilit, ish-kreut të Bashkisë së Dibrës, i cili postin e trajtonte si karem për të peshkuar seks, na shfaqet tashmë dhe një gjyqtar nga jugu, Guximtar Boçi, emri i të cilit ka kapur majat e klasifikimit për kalim gojë më gojë, sidomos në qytetin e tij, Gjirokastër.
Por nga vjen Guximtari? Cili ka qenë profili i tij publik dhe ç’po thonë për të e aktin e tij në qytetin jugor?
Ai nuk është gjirokastrit safi, por zhulatas i tillë, një fshat jo pak i njohur për zakone e tradita. Dhe vetë Guximi rrjedh nga një familje mjaft e respektuar e këtij fshati. Aty, ai ka jetuar deri në moshën 14-vjeçare, ku më pas ka nisur shkollimin deri në diplomimin si jurist. Të rinjtë e Zhulatit, shumë kohë më parë janë njohur si të angazhuar me blektori, por që kur bëheshin burra me mustaqe merrnin pushkën e luftonin. Ama ky lloj riti jete do ndryshonte kohë pas kohe dhe djemtë do prireshin për t’u shkolluar, një fat që e pati edhe Guximi, që guximshëm pra arriti të bëhej jurist e posaçërisht gjykatës, por po aq guximshëm rezulton të ketë abuzuar me postin duke ia marrë erzin vetes në këtë moshë, si baba i dy vajzave që shumë shpejt do bëhej edhe gjysh, meqë njërën prej tyre po e martonte.
Ai është emëruar gjyqtar i Gjykatës së Rrethit Gjyqësor Gjirokastër kur ishte 36 vjeç. Nuk mund të thuhet se për të personalisht, opinioni kishte ndonjë konsideratë të veçantë, por as ndonjë përçmim. Sepse, edhe pse ndodh që të urrehet ajo çfarë ndodh me drejtësinë në Shqipëri, jo në çdo rast gjykimi negativ shkon dhe mbi persona të caktuar. Kështu që dhe për Guximtar Boçin nuk ekzistonte ndonjë opinion i caktuar për mirë a për keq. Kjo në varësi të atyre që kanë patur të bënin me të në çështje gjyqësore. Por përgjithësisht, opinioni anonte kah vlerësimi si një burrë me dinjitet dhe familjar i mirë.
E tashmë, ajo që vihet re në opinionin gjirokastrit këto ditë, është një irritim esktrem ndaj atij për aktin e abuzimit me postin për përfitime seksuale.
Xha Hasani, është ndër ata që e ka në majë të gjuhës formulën se si mund t’u vinte hakut individëve të tillë. Jo thjesht se Enveri ishte nga Gjirokastra, ai thotë se do dëshironte që të ringjallej edhe njëherë ai burrë e t’i varte të tillë njerëz mu atje, tek sheshi i Çerçizit.
Kështu edhe Drita, qytetare e vjetër Gjirokastrës, ofron si zgjidhje sheshin e njohur.
Pse ndodh kështu? Ndoshta jo aq për gjestin, sesa nga fakti që vjen nga drejtësia. Kjo e fundit është bërë aq e urryer ndër njerëz, sa mjafton ceni më i vogël i ndonjë aktori të saj që më pas njerëzit ta bëjnë lanet. Kështu po ndodh këto orë në Gjirokastër: Guximin po e bëjnë lanet…/tesheshi.com/
