Ministri i Jashtëm në detyrë Gent Cakaj, i është shmangur ndonjë komenti me risk politik sa i përket përballjes së tij me Albin Kurtin, në kuadër të bashkëpunimit që do kenë dy qeveritë, pasi ky i fundit pritet të jetë kryeministër i Kosovës.
Cakaj, një emër i kundërshtuar nga Kurti, ka gjithashtu dhe rolin e një ministri të Jashtëm hije për Kosovën, vend dhe nga vjen, sipas strategjisë së re të diplomacisë së Tiranës, për të bërë dhe atë të Prishtinës.
“Ne mezi po presim të fillojmë bashkëpunimin me qeverinë e re të Kosovës. Kosova është realitet e njohin apo jo disa shtete”, tha Cakaj gjatë një konference për shtyp me homologun austriak Alexander Schallenberg.
Nga ana tjetër, njeriu që ka barën e rëndë të hapjes së negociatave, pra sigurimit të çdo “Po”-je atje ku mund të ketë skepticizëm, tha se nuk u trembet “Jo”-ve, referuar Francës dhe Hollandës.
“Nuk kam frikë nga votat kundër, por jam i angazhuar maksimalisht për të siguruar votat pro”, u përgjigj prerë Cakaj. /tesheshi.com/
