Kryeministri hungarez Viktor Orban mbërriti në Berlin të premten më 21 qershor dhe para takimit me kancelarin Olaf Scholz, në një intervistë kritikoi politikën gjermane të imigracionit.
“Gjermania sot nuk duket si dhjetë vjet më parë… Kjo Gjermani nuk është më Gjermania që gjyshërit dhe prindërit tanë na dhanë si shembull,” i tha Orban radios shtetërore hungareze Kossuth përpara një takimi me kancelarin gjerman Olaf Scholz.
“Sot, Gjermania është një botë shumëngjyrëshe, e ndryshuar multikulturore ku emigrantët nuk janë më mysafirë”, tha kryeministri hungarez.
Ai shtoi se problemi është se “qeveria e majtë” në Berlin “shpërndan masivisht pasaportat gjermane”.
“Emigrantët nuk janë më mysafirë të mikpritësve gjermanë, por tani kanë të drejtat e tyre”, përfundoi Orban. Ai ka përsëritur edhe një herë se vendimin e duhur e ka marrë në vitin 2015 kur nuk i ka lejuar refugjatët të qëndrojnë në Hungari.
Në të njëjtën intervistë, ai kritikoi gjithashtu planet e personelit në Bruksel, të cilat tregojnë për rizgjedhjen e Ursula von der Leyen, e cila është “produkt i një koalicioni për luftë dhe migrim”, njëherësh duke akuzuar gjermanin Manfred Weber të konservatorëve evropianë në të djathtë se po përpiqet të realizojë “planet e Sorosit”.
Orban ndodhet në Berlin me rastin e presidencës së Hungarisë me Bashkimin Evropian më 1 korrik.
Ndryshe nga zakonet gjatë vizitave të punës, pas takimit nuk është planifikuar asnjë konferencë për shtyp, ndërsa mediat gjermane raportojnë se anulimi i takimit me mediat dhe shmangia e takimeve me foto është “dëshirë e zyrës së Kancelarit”.
Scholz dhe Orban morën pjesë në ndeshjen Gjermani-Hungari në Kampionatin Evropian të Futbollit këtë javë, por nuk u ulën pranë njëri-tjetrit.
Orban është një nga kritikët më të ashpër të politikës së hapur të migracionit të qeverisë gjermane, veçanërisht në kohën e kancelares Angela Merkel. /tesheshi.com/
