Ka ndërruar jetë në moshën 84-vjeçare shkrimtari dhe eseisti i madh europian, italiani Umberto Eco.
Ai ishte filozof, semiolog, e një ekspert i jashtëzakonshëm i komunikimit. Eco nuk e humbi kurrë dëshirën për të vëzhguar politikën. Sapo kishte inaguruar një shtëpi botuese, “Anija e Tezeut”, duke refuzuar të botonte në monopolin që kanë krijuar Mondadori i Berlusconi-t dhe Rizzoli në fushën e botimit, që e cilësoi “La Mondazzoli”.
Lajmin e ka konfirmuar familja e tij, e cila bën të ditur se Eco është shuar mbrëmë në shtëpinë e vet në Romë.
Umberto Eco lindi më 5 janar 1932, ndërsa ishte studiues i semiotikës mesjetare, filozof, kritik letrar dhe
novelist. Ishte më së shumti i njohur për romanin ” Emri i Trëndafilit” (“Il nome della rosa”), i botuar në vitin 1980.
Romani është një mister intelektual, që ndërthur në një vepër semiotikën, analizën biblike, studimet mesjetare dhe teorinë mbi letërsinë. Ai ka shkruar gjithashtu tekste akademike, libra për fëmijë, e shumë ese.
Eco ishte president i Scuola Superiore di Studi Umanistici në universitetin e Bolonjës, anëtar i Accademia dei Licei, e Bursist Nderi në kolegjin Kellogg në Universitetin e Oksfordit.
Eco ka lindur në Alessandria, në rajonin e Piemontes, në Italinë e veriut. Mori arsimin bazë pranë urdhërit Salezian. I ati i sugjeroi Umbertos të studionte për jurist, por ai u regjistrua në Universitetin e Torinos, për të studiuar filozofinë dhe letërsinë mesjetare.
E shkroi tezën e vet të diplomës mbi Tomas D’Akuinin, dhe e fitoi diplomimin në letërsi në vitin 1954.
Gjatë kësaj kohe, Eco u largua nga Kisha Katolike, pasi pësoi një krizë besimi. Ai punoi si redaktor kulture te Radio Televizioni i Italisë (RAI) dhe si profesor në Universitetin e Torinos. Një grup avangardë artistësh, piktorësh, muzikatësh dhe shkrimtarësh, me të cilët u miqësua gjatë punës në RAI, të quajtur “Grupi 63”, patën një ndikim të madh te karriera e tij e ardhshme si shkrimtar.
Libri i tij i parë, “Il problema estetico in San Tommaso”, i cili qe një variant i zgjeruar i tezës së tij të doktoraturës, u publikua në vitin 1956.
Në vitin 1962, Eco u martua me Renate Ramge, një mësuese gjermane e artit, me të cilën ka një vajzë dhe një djalë. Jetoi pjesërisht në Milano dhe pjesërisht në shtëpinë e vet të pushimeve pranë Riminit. Zotëronte një bibliotekë me 30 mijë volume në Milano, dhe një tjetër me 20 mijë volume në Rimini.
Ndër veprat e tij të njohura cilësohen: Emri i Trëndafilit, Lavjerrësi i Fukosë, Baudolino, Viti Zero, etj. /tesheshi.com/
