Autoritetet amerikane po hetojnë intensivisht mbi raketat që u zbuluan në një avion serb pasagjerësh para pak ditësh në aeroportin e Beogradit. E përditshmja serbe, Informer thekson se hetuesit nga SHBA janë ankuar nga bashkëpunimi me policinë serbe.
Bëhet fjalë për një ngarkesë që sipas të dhënave të para vinte nga Irani, por dyshohet se ka edhe lidhje me Sirinë, duke pasur parasysh se Beogradi ka qenë një nga furnizuesit kryesorë me armatime të Bashar al Asadit.
Dy raketat u gjetën në një ngarkesë e cila po kalonte tranzit për në SHBA, në një aeroplan të pasagjerëve të kompanisë Air Serbia, nisur nga Libani për në Serbi.
Ngarkesa u zbulua në aeroportin Nikola Tesla të Beogradit dhe përmbante dy palë “raketa të blinduara” në bordin e një aeroplani udhëtarësh të aerokompanisë Air Serbia, nisur nga Bejruti.
Raketat ishin paketuar në arka druri, dhe ngarkesa ishte e drejtuar për në SHBA, me destinacion Portland, Oregon.
Një zëdhënëse për zyrën e FBI në Portland deklaroi se Byroja Federale e Hetimeve nuk kishte ende asnjë informacion për transportimin e tyre.
Air Serbia tha se është duke bashkëpunuar me një hetim me FBI.
Raketat janë në gjendje të kyçur në një objektiv para ose pas nisjes, në bazë të një përshkrim nga Lockheed Martin. Një raketë e lehtë mund të shkatërrojë një makinë apo një tank. Kompania thekson se raketat të këtilla janë përdorur në të dy raste në Irak: Operacionin “Liria e Qëndrueshme” dhe operacionin “Liria e Irakut”.
Robert Caruso, një ish-zyrtar i Departamentit të Shtetit, shkroi në twitter se nuk ka arsye për transportin e raketave nga Libani në Serbi e pastaj në SHBA, por vetëm nëse fshihet një atentat terrorist.
Sipas Aleksandër Radiq, një analist ushtarak armët janë transportuar herë pas here nëpërmjet aeroportit Nikola Tesla por misteri është pse ata janë vendosur në një avion pasagjerësh. Ai shtoi se aeroporti është përgjegjës për të kontrolluar të gjithë bagazhin para se malli të futet në bord.
Përgatiti Ylli Pata – /tesheshi.com/
