Kombëtarja e Shqipërisë ka vazhduar me rezultatet fantastike, duke e mposhtur Francën në miqësoren e zhvilluar në “Elbasan Arena”.
Vendimtar ishte goli i mesfushorit Ergys Kaçe, i cili shënoi nga goditja e dënimit në minutën e 43-të.
Shqipëria shkruan historinë pasi ka mundur për herë të parë një kampione bote dhe për herë të parë “gjelat” e Francës, gjë e pandodhur deri tani nga kuqezinjtë.
Pra, Elbasan Arena duket se është fusha me fat për kombëtaren e Gianni de Biasi-t. Pas asaj paraqitjeje të shkëlqyer në Rennes muaj më parë ndaj Francës ku barazuam 1-1, Shqipëria përsërit një tjetër performancë fantastike në “Elbasan Arena” para tifozëve kuqezi duke fituar miqësoren ndaj “gjelave” me rezultatin 1-0.
Një perlë e Ergys Kaçes në minutë e 43′ vendosi fatin e ndeshjes, takim që në fakt u dominua dhe tregoi se ishte Shqipëria ekipi që donte dhe kërkonte më shumë këtë fitore. Edhe njëherë kjo ndeshje tregoi formën e jashtëzakonshme të djemve të De Biasit por që merita shkon pikërisht për trajnerin italo-shqiptar. Për t’u shënuar, fakti që ky është suksesi i parë në histori për Shqipërinë ndaj Francës edhe pse një takim miqësor.
