Kryeministri Rama shpalli betejën për mjedisin, më saktë pastrimin e Shqipërisë nga plehrat dhe mbetjet e llojeve të shumta. Sipas tij, sezoni turistik i ardhshëm, duhet të gjejë një tjetër Shqipëri nga kjo që është.
“Do të kthehet në operacion 6 mujor e do të përfundojë më 24 maj 2018, çdo ditë ne do të jemi të angazhuar në territor me të gjitha forcat, duke përdorur të gjitha rrugët e komunikimit, duke vënë në dispozicion të këtij operacioni të gjitha mjetet e mundshme në çdo nivel, në mënyrë që Shqipëria turistike e sezonit të ardhshëm të jetë shumë më e lehtësuar nga barra e këtyre plehrave në të gjithë trupin e vet. Në këto 6 muaj nuk do të mjaftohemi me operacionin po do të bëjmë ndërhyrje të rëndësishme për të ndërtuar mekanizma efikas që ajo që do të arrijmë në këto 6 muaj të mos përmbyset në 6 muajt e ardhshëm dhe kur të vijë dita e aksionit tjetër të mos jemi prapë në këtë situatë”, tha Rama.
Kreu i qeverisë dha shifrën e 9100 vendhedhjeve pa kriter të plehrave dhe tha se këtej e tutje krimi mjedisor do jetë përgjegjësi e policisë.
“Nuk mundet më që policia e shtetit t’i rrijë larg zhvillimit kriminal në të gjithë territorin të një veprimtarie të përditshme qytetare që është bërë si ngrënia e vakteve të ushqimit”, tha shefi i ekzekutivit. /tesheshi.com/
