Media gjermane i ka kushtuar një shkrim të hidhur dhe tendencioz faktit se fëmijë turq të Qipros së Veriut po shkojnë në kampe verore në Turqi dhe aty po marrin dhe mësime fetare.
“Presidenti Erdogan dëshiron të forcojë Islamin edhe në pjesën veriore të Qipros. Siç tregon gjithçka, pjesë e planit është thithja fëmijëve qipriotë turq në Turqi në kampe, ku mbahen mësime sistematike për Islamin”, shkruan Rrjeti Gjerman i Gazetarisë RND, në mbështetje të një shkrimi në median greke me titull “Si i edukon Erdogan turqit qipriotë në Turqi në kampe”.
“Volejboll, kalërim, teatër, art: programi në të cilin marrin pjesë 46 nxënës nga veriu i Qipros është i pasur. Megjithatë, në vend të kësaj, fëmijët turq e gjejnë veten duke marrë mësime rreth Islamit. Aktivitete të tilla verore janë pjesë e planit të presidentit turk për të nxitur ndjenjat fetare midis turqve qipriotë”, shkruan ky rrjet, duke përcjellë idenë e zbulimit të një komploti.
Gazeta greke qipriote Cyprus Mail shkon më tej kur shkruan se “kampet organizohen nga Ministria Turke e Rinisë dhe Sporteve në bashkëpunim me Shërbimin Arsimor qipriot turk. Programi u drejtohet kryesisht familjeve turke qipriote më të dobëta ekonomikisht, të cilët nuk kanë mundësi t’i dërgojnë fëmijët e tyre me pushime. Që në ditën e pare, fëmijët turq qipriotë në kamp filluan të derdhin lotë. Të shumtë ishin ata që u telefonuan prindërve duke u kërkuar që të vinin t’i merrnin”, shkruan kjo media, duke shtuar se “në vend të sportit, fëmijët prisnin mësime dhe lutje të Kuranit”.
Më tej thuhet se “kur filloi pushtimi turk i Qipros veriore në 1974, 80% e popullsisë së përgjithshme të Megalonisos ishin grekë dhe 18% turq. Që atëherë, megjithatë, Ankaraja ka zhvendosur më shumë se 100,000 kolonë nga kontinenti i Turqisë në Qipro. Tashmë gjysma e popullsisë në pjesën veriore të ishullit janë kolonë turq, gjë që nuk ndryshon vetëm përbërjen demografike të popullsisë. Ai gjithashtu ndryshon marrëdhëniet e popullsisë me fenë. Pavarësisht se 99% e turqve qipriotë janë myslimanë, feja nuk luante asnjë rol as në jetën e përditshme dhe as në arsim.
E gjithë kjo ka ndryshuar në 20 vitet e fundit që kur Erdogan mori frenat e vendit. Synimi i Tayyip Erdogan për të forcuar Islamin në Turqi ndihet edhe në Qipron veriore, siç dëshmohet nga numri i xhamive që po ndërtohen sipas dëshirës së presidentit në pjesën veriore të ishullit të ndarë”. /tesheshi.com/
