Islam Hyseni nga Kosova me bashkëshorten dhe 6 fëmijët e tyre sapo kishin mbërritur në Velipojë dhe kishin zënë një apartament në resortin Fishta.
Hyseni po merrte çelësat e dhomës së tij poshtë tek lokali i resortit kur ka ndodhur shpërthimi i fuqishëm që la të plagosur rëndë 3 vetë dhe 20 të tjerë.
Një minutë ka përcaktuar fatin e tij dhe të fëmijve, pasi Hyseni ka vepruar shpejt duke i nxjerrë jashtë ata para se flakët të përpinin lokalin.
“Në momentin kur kanë dëgjuar një zhurmë kanë marrë fëmijët dhe kanë dalë jashtë. Sapo kanë dalë jashtë është dëgjuar shpërthimi i parë. Shpërthimi i dytë ka ndodhur pak para se ata të nxirrnin fëmijët jashtë lokalit. Forca e shpërthimit të dytë ka nxjerrë jashtë pronarin e lokalit dhe djalin e tij”- u tregoi ai sot gazetarëve.
Valixhet me rrobat i kishin lënë para lokalit, por pas shpërthimit kanë mbetur vetëm disa lecka të djegura dhe Hyseni po kërkonte pasaportën që ka humbur mes rrobave. Ai mund ta konsiderojë veten me fat sot, ndërsa shteti shqiptar duhet të jetë më vigjilent për sigurinë e hoteleve turistike. /tesheshi.com/
