Të tjera detaje janë zbuluar mbi shpërthimin e automjetit të presidentit të ekipit të Kamzës, Naim Qarri, duke shkaktuar dëmtimin e pjesshëm të saj.
Ngjarja ndodhi të hënën në mbrëmje, ndërsa nga ky shpërthim fatmirësisht nuk ka të dëmtuar në njerëz.
Automjeti mësohet se ka qenë i parkuar, kur në të është vendosur lënda plasëse, e cila ende nuk ëhstë përcaktuar nga policia.
Gjithsesi nga hetimet paraprake, besohet se sasia e lëndës plasëse nuk ka qenë më shumë se 50 gram.
Burime nga grupi hetimor besojnë se fillimisht është thyer xhami i përparmë i mjetit, ndërsa lënda plasëse është hedhur në sediljen e pasagjerit, ku edhe ka shpërthyer duke shkaktuar dëme në pjesën e përparme të mjetit.
Automjeti i dëmtuar është tip Hummer dhe hetuesit paraprakisht mendojnë se lënda plasëse është ndezur përmes fitilit.
Gjithsesi grupi hetimor po punon për zbardhjen e ngjarjes dhe për identifikimin e autorit ose autorëve.
Hetimet mësohet se po kryhen nga oficerë të krimeve të rënda, të cilët nga mbrëmja e djeshme janë angazhuar në vendin e ngjarjes.
Zyrtarisht organet e hetimit nuk kanë ngritur ndonjë pistë, megjithëse burimet shprehen se po hetohet në të paktën dy të tilla.
Burime nga grupi hetimor thanë se është pyetur paraprakisht në vendngjarje pronari i mjetit, Naim Qarri, i cili ka deklaruar se nuk ka asnjë dyshim konkret për autorësinë, pasi nuk ka probleme me njeri.
“Isha në lokal kur dëgjova shpërthimin dhe dola menjëherë për të parë çfarë kishte ndodhur. Pashë që diçka kishte ndodhur te makina ime, por mendova se mos ishte ndonjë shkëndijë elektrike. Makinën e kam pasur të parkuar aty prej disa orësh. Nuk i kam borxhe askujt dhe nuk kam probleme me njeri”, u shpreh Qarri, pas ngjarjes. /tesheshi.com/
