Nga Mensur Krasniqi
Nuk është e vërtetë që sektori hekurudhor në Maqedoni po përjeton një përiudhë të vështirë si pasojë e dundjes së refugjatëve. Kjo mund të jetë e vërtetë për aspektin human, ndërsa për atë financiar kurrsesi. Sepse Hekurudhat e Maqedonisë po jetojnë kohë të arta për shkak të të ardhurave financiare në kurriz të refugjatëve që vijnë nga Lindja. Ky fakt është denoncuar të premten nga zëra të shoqërisë civile në Shkup, përkatësisht fondacioni Shoqëria e Hapur, Komiteti i Helsinkit, shoqata joqeveritare Legis, të cilat u kanë përcjellë një mesazh Hekurudhave, ndërmarrjes pra që menaxhon ato, që të ndalin dorën abuzive duke ua shitur biletat refugjatëve me çmime luksi. Ata kërkuan që dhe shteti mos qëndrojë duarkryq, por të ndërhyjë në këtë situatë.
Drejtoresha e fondacionit Shoqëria e Hapur, Fani Karanfilova-Panovska, tha se është e zhgënjyer nga mënyra se si Hekurudhat e Maqedonisë, në kundërshtim me ligjet, u kërkojnë refugjatëve nga 25 euro për kartë, dhe atë pa e shoqëruar me llogari fiskale.
“Në kurrizin e refugjatëve, kjo kompani shtetërore dëshiron të përfitojë. Për shkak të kësaj, kërkojmë që refugjatët që po kalojnë tranzit në Maqedoni të mos jenë të diskriminuar dhe të ngarkuar në mënyrë shtesë financiarisht me çmime ekstremisht të larta për shfrytëzimin e shërbimeve nga transporti publik. Nëse nuk është e mundshme që tërësisht të lirohen nga obligimi i pagesës së transportit në tranzit, kërkojmë urgjentisht uljen e çmimeve të kartave dhe bashkimin e tyre me çmimet e parapara për qytetarët e Republikës së Maqedonisë. Institucionet kompetente le të kryejnë kontroll ndaj punës financiare të njërës prej ndërmarrjeve më të mëdha shtetërore e cila në mënyrë të padrejtë e ka rritur çmimin për transportin publik për refugjatët ku në opinion po i rrit dyshimet se po përfiton në dhimbjen dhe vuajtjet e njerëzve që po kalojnë transit nëpër Maqedoni”, deklaroi Karanfilova-Panovska.
Ndërsa Mersiha Ismailoviq nga Legis, ipërmendi problemet dhe kushtet johumane me të cilat refugjatët përballen gjatë kohës së kalimit nëpër Maqedoni.
“Në këto net të ftohta, nuk ka ngrohje në kampe. Fëmijët po ngrijnë pasi nuk kanë ku të ngrohen. Ajo që më së shumti pengon është se Hekurudhat paguajnë karta edhe për fëmijët e vegjël që është e palejueshme sipas ligjeve në fuqi. Problemi është se policia lëviz deri në gardhin e fundit dhe këndej nuk ka më kontroll se çfarë ndodh. Konduktorët, të flaktë për para, po i mbushin tepër vagonët.
Njerëzit ulen në korridore, në kabina, ndërsa në 5 prej 10 vagonave nuk ka rrymë. I mbyllin prej jashtë dhe nuk i lënë të dalin. Isha dëshmitare kur një njeri trokiti gati 40 minuta për ta lëshuar jashtë”, theksoi Ismailoviq. /tesheshi.com/
