Nga Mensur Krasniqi
Ka ca qytetet që kur vjen Ramazani, se ç’u bie një tjetër lloj nuri, a lezeti siç i thonë. Dhe ndodh që kur bën ftohtë, të të duken të ngrohta; e kur bën nxehtë, të të duken të freskëta. Një ndër to është kryeqytetit maqedon, Shkupi. Për disa, ky qytet në Ramazan, të asocon deri dhe me vendet e shenjta, Meken apo Medinen, ndonëse gjysma, për shkak të përbërjes etnike, nuk ka asnjë lidhje me Ramazanin. Por dhe që dhe ata, me gjysëm zëri, ndoshta e pranojnë se një tjetër atmosferë e mbërthen qytetin kur vjen ky muaj. Dhe kjo, ndodh prej shekujsh.
Bekir Halimi, një ndër hoxhallarët e njohur në kryqytetin maqedon, njëherësh dhe figurë e njohur publike e jetës në Maqedoni, thotë një shprehje me një përmbajtje të lartë kumtuese për shijen e rrallë të Ramazanit në Shkup.
“Në Ramazan, kush ka para shkon në Qabe, e kush s’ka para vjen në Shkup!”.
Më tej, hoxhë Bekir Halimi, rrëfen mbi këtë atmosferë pa të cilën Shkupi, një muaj në vit pra, nuk mund të kuptohet, e aq më pak të shijohet.
“Ramazani ka nje traditë të theksuar në qytetin e Shkupit, të cilën traditë e kemi gjetur që nga koha e fëmijërisë. Ndezja e kandilave të xhamisë në natën e parë të ramazanit, pastaj pritja e ndezjes së kandilave në kohën e iftarit nga fëmijët e lagjes, leximi i Kur’anit nëpër xhamitë e qytetit, ligjëratat e mbajtura në kohën e drekës, ikindisë dhe para teravisë, mbushja e xhamive me xhemat për namazin e teravisë, pritja e iftarit familjarisht në sofrën e shtruar para iftarit, thirrja e mysafirëve dhe vizita e farefisit për iftare, janë veçoritë tradicionale të Ramazanit në qytetin e Shkupit. E mbaj mend si fëmijë, 6 a 7-vjeçar shkoja me babën në xhaminë e Sulltan Muratit për namaz te ikindisë për t’u falur dhe për të dëgjuar ligjëratën më pas, vepër e cila na ndihmonte ta kalojmë më lehtë ditën e gjatë të Ramazanit në stinën e verës. Unë e kam thënë dhe e them se në Ramazan, kush ka para shkon në Qabe, e kush s’ka para vjen në Shkup, e gjithë kjo për shkak të atmosferës së këndshme që krijohet në këtë qytet”.
Ndërkohë, hoxha tjetër i njohur, që edhe pse nuk është nga Shkupi identifikohet me këtë qytetet për shkak të ligjërimeve të tij ns mexhliset e kryeqytetit maqedon, i rendit me pika të gjitha ato që e bëjnë Shkupin një lloj “Meke” ballkanase gjatë Ramazanit…
“Shkupi veçohet me disa dukuri të veçanta në ramazan
1.Përjetimi i Ramazanit në Shkup e ka shijen e dalluar,ngase në të vetëm me ardhjen e mysafirit të ndershem, ndryshon krejtësisht atmosfera. Në Shkup e ke vështirë të gjesh një restorant të hapur gjatë ditës së agjërimit, gjë që bën me dije se agjërimi çmohet në mënyrë të veçantë.
2.Agjërimi në Shkup e bën të lumtur edhe punëtorin, ngase zvogëlohet orari i punës gjatë ditës së agjërimit dhe nderohen punëtorët agjerues ku dhe u jepet rroga e plotë me gjithë orarin e shkurtuar.
3.Pamjet e xhamive janë mahnitëse, ngase e ke vështirë të dallosh nëse je në xhuma apo në një ditë tjetër, je në namazin e jacisë apo të sabahut.
4.Bukuria e xhamive është më e madhe, pasi gjatë tërë Ramazanit në çdo xhami ligjërohet pas namazit të mesditës apo ikindisë dhe para namazit të jacisë.
- Në shumë xhami gjithashtu këndohet Kur’an para dhe pas namazit të sabahut, ku prezentojnë muslimanë dhe dëgjojnë bukurinë e recitimit të fjalëve të Allahut.
6.Gjatë muajit Ramazan shtrohen iftare të ndryshme që ia shtojnë bukurinë e agjërimit dhe e shtojnë gjithashtu gëzimin dhe dashurinë mes njëri-tjetrit.
7.Në Shkup, gjatë muajit Ramazan pothuajse çdo iftar çelet i përbashkët me miqë dhe dashamirë, duke i afruar dhe më shumë njerëzit mes vedi.
8.Po të jesh në Shkup gjatë netëve të Ramazanit, e ke vështirë të kuptosh se është natë apo ditë me gjallërimin e netëve të bekuara, me namaz nate gëzim, vizita dhe biseda të frytshme.
9.Mosagjëruesi në ramazan në Shkup është vërtet i huaj, i përbuzur, i nënçmuar.
Dhe këto janë disa nga elementet e shumta që e bëjnë Ramazanin më të këndshëm dhe më të dalluar në Shkup”, deklaroi hoxhë Sadullah Bajrami nga Kumanova e Karadakut.
Ky pra është Shkupi, qyteti që shndërrohet në “Mekën” e Ballkanit kur vjen Ramazani. /tesheshi.com/
