Kandidati i Lëvizjes BESA për komunën e Çairit në Shkup, Zeqirija Ibrahimi, ka ofruar një gjetje gjuhësore në vokabularin elektoral, fjalën “çlirim”, për atë që e konsideron marrje nën drejtim të kësaj komune, e cila prej vitesh udhëhiqet nga Izet Mexhiti i BDI-së.
“…kanë mbetur edhe pak ditë që këtë komunë ta çlirojmë nga pengmarrja që ia kanë bërë këto 12 vite këta që kanë keqqeverisur me të”
“…ne jemi këtu për t’ju thënë se, pavarësisht se numri i mashtruesve në këtë fushatë është shtuar shumë, ne do të jemi këtu për të dëshmuar se nuk janë të gjithë pjesëmarrësit në këtë fushatë parazgjedhore mashtrues dhe premtimthyes.
Shihemi nesër. Kështu deri në çlirimin e Çairit”, është shprehur i njohuri si Zeka i BESËS, ndër figurat kryesore të kësaj partie. Në ballafaqimin e parë me elektoratin e Çairit, mesazhi i tij ka qenë një denoncim për ata që i ka konsideruar gënjeshtarë, mashtrues e të pabesë.
“…duke ju thënë se ai që gënjen quhet gënjeshtar, ai që mashtron quhet mashtrues, ndërsa ai që nuk e mban premtimin quhet i pabesë. Këto janë definicione që ne i kemi mësuar si fëmijë, por që tash na vijnë ndër mend, kur shohim se oponentët tanë politikë, pra partia që deri tash ka keqqeverisur me Çairin tonë, në vend se të dalë të kërkojë falje për shëmtinë e degradimin që ia ka bërë Çairit, akoma ka guxim të dalë të kërkojë votën e qytetarëve”, ka thënë ndër të tjera Ibrahimi.
BESA ka arritur një parafitore në Çair, me një rezultat në zgjedhjet e përgjithshme dhjetorin e kaluar duke dalë forcë e parë, pikërisht në një zonë bastion të BDI-së. Tashmë ajo synon marrjen e kësaj komune në kuadër të zgjedhjeve të pritshme lokale. /tesheshi.com/
