Shkalla e shkrim-leximit tek të rriturit është ulur në vendet e Bashkimit Evropian në dhjetë vitet e fundit, raporton Anadolia.
Komisioni i BE-së ka publikuar rezultatet e Anketës Ndërkombëtare të Aftësive të Rriturve (PIAAC), të cilën e ka bashkëfinancuar me Organizatën për Bashkëpunim dhe Zhvillim Ekonomik (OECD).
Rezultatet e hulumtimit të kryer në 20 shtete anëtare të BE-së, si dhe në Japoni, Norvegji, Britaninë e Madhe, Kanada, Zvicër, Zelandën e Re, SHBA, Singapor, Korenë e Jugut dhe Izrael zbuluan se aftësitë e shkrim-leximit dhe numërimit të të rriturve në këto vende janë ulur ose kanë ngecur në dhjetë vitet e fundit.
Sipas anketës me të rriturit e moshës 16 deri në 65 vjeç, situata është përmirësuar ndjeshëm në Finlandë dhe Danimarkë, ndërsa përveç këtyre dy vendeve, përparim në aftësitë numerike është shënuar në Estoni dhe Holandë.
Hulumtimi zbuloi gjithashtu se hendeku i aftësive midis të rriturve me performancë më të ulët dhe më të mirë ishte zgjeruar, veçanërisht në shkrim-lexim.
Rënia e shkrim-leximit
Kur shikohen vendet e mbuluara nga anketa në përgjithësi, u vu re se aftësi të avancuara në të dyja fushat u shfaqën nga Finlanda, Japonia, Holanda, Norvegjia dhe Suedia.
Ndër vendet e BE-së, rezultatet më të ulëta në shkrim-lexim u regjistruan në Poloni, Lituani, Republikën Çeke, Hungari dhe Austri.
Pasojnë Franca, Italia, Irlanda, Spanja dhe Holanda, me një rënie më të moderuar.
Rezultate negative u gjetën edhe për aftësitë numerike në Lituani, Poloni, Hungari dhe Sllovaki.
Ndër vendet jashtë BE-së, rënia më e madhe e shkrim-leximit është shënuar në Kore, Zelandën e Re dhe SHBA. /tesheshi.com/
