Nga Blendi Gashi
Vendimin e parë, Ramush Haradinaj, si kryeministër e ka marrë në lidhje me marrëveshjen e Demarkacionit me Malin e Zi, të cilën e kundërshtoi fuqishëm si opozitar. Ai shkarkoi “armikun” e tij Murat Mehën, nga funksioni i kryetarit të Komisionit Shtetëror, dhe anëtarët e tjerë, duke emëruar si drejtues ish-deputetin e LDK-së, Shpejtim Bulliqi.
Haradinaj para se të hidhte në votim këtë vendim tha se për të emëruar komisionin e ri është dakordësuar me partnerët e koalicionit. Në vijim ai shtoi se komisioni do t’i sjellë qeverisë të gjeturat në lidhje me shenjëzimin e kufirit me shtetin e Malit të Zi.
“Ky komision, edhe ashtu e ka pasur afatin e skaduar. Është dashur të krijohet një komision i ri. Unë sot jam konsultuar edhe me partnerët politikë. i propozoj qeverisë shkarkimin e këtij komisioni, sot. Njëkohësisht edhe të votojmë komisionin e ardhshëm, por atëherë kur t´a kemi të gatshëm. Ju njoftoj se i kam kërkuar dhe besuar udhëheqjen e këtij komisioni, profesor Shpëtim Bulliqit, i cili do të marrë përsipër që të krijojë të riun. Kosova ka ngecur me këtë temë. Kjo ka mbetur pezull, pa marrë një vendim të caktuar. Kjo ndërlidhet edhe me liberalizimin e vizave. Kemi edhe plot arsye shtesë pse nuk mundemi me ngecim”, tha Haradinaj.
“Goditja” e parë nga”Srpska”
Por jo të gjithë ministrat e kabinetit të tij ishin njëzëri me shefin e tyre. Ashtu siç pritej, ministrat e Listës Serbe i treguan “dhëmbët”, duke i bërë të ditur Haradinajt se nuk do të pajtohen me çdo vendim të tij.
Ministrat Dalibor Jevtiç dhe Nenad Rikalo abstenuan ndaj propozimit të Haradinajt.
Arsyet pse dy ministrat serbë nuk votuan mbeten të paqarta, por kjo mund të shihet si një sinjal se Lista Serbe nuk pajtohet që të rishikohet marrëveshja me Malin e Zi, pra mund të mos i japë votat për një version tjetër të kësaj marrëveshje.
Shqetësimi i ministrit të PDK-së…
Përveç abstenimit nga Lista Serbe një gjë që vlen të përmendet është edhe brenga e PDK-së kundrejt ndryshimeve për procesin në fjalë.
Abelard Tahiri, ministri i ri i Drejtësisë, njëherësh ish-këshilltar i Thaçit në kohën kur ky i fundit nënshkroi marrëveshjen me Malin e Zi, vuri në një situatë pak të vështirë kryeministrin Haradinaj, pasi e pyeti se a është konsultuar me palën malazeze për ndryshimet rreth procesit të Demarkacionit.
Haradinaj duke mos saktësuar nëse ka biseduar me zyrtarët malazez dha një përgjigje të përgjithshme. “Jemi në kontakt me palën malazeze dhe se s’do të ketë asnjë problem”, sqaroi ai.
Ja ç’shkruajnë mediat malazeze
Vendimi i Haradinajt ka zënë vend edhe në mediat malazeze.
“Haradinaj shkarkoi Komisionin Shtetëror për Demarkacionin” mban titullin lajmi në Vijesti.me , ku shpjegohet vendimi i kryeministrit të Kosovës.
Ndërkohë Radio Televizioni i Malit të Zi në faqen online ka cituar Haradinajn, i cili thotë se marrëveshja për Demarkacionin mes Kosovës dhe Serbisë është e gabuar.
Ndërkohë deri më tani për vendimin e Haradinajt nuk kanë reaguar drejtuesit e institucioneve malazeze.
Kujtojmë se ministri i Jashtëm i Malit të Zi, Srdan Darmanoviç, në janar të këtij viti deklaroi se Demarkacioni është problem i brendshëm i Kosovës. /tesheshi.com/
