Deputetët e Listës Serbe janë përplasur keq mes tyre në takimin që kanë mbajtur sot në Kuvend ku temë diskutimi ishte gjendja e krijuar në këtë parti pas raportimeve se Aleksandar Jabllanoviq është riemëruar në postin e kryetarit. Përplasja ka ndodhur mes deputetit Sllobodan Petroviq dhe zv.kryeministrit, Branimir Stojanoviq, pasi ky i fundit, nuk e kishte ftuar në takim Petroviqin.
“Kush je ti…, ti je turpi më i madh i popullit serb…”, ishin fjalët që Petroviq ia drejtoi Stojanoviqit. Kurse Stojanoviq i kërkoi Petroviqit që të lëshojë sallën dhe të dalë jashtë, raporton radio “Evropa e Lirë”.
Takimi udhëhiqej nga Slavko Simiq, por debatet vazhduan ndërmjet Stojanoviqit dhe Petroviqit.
“Ti dhe Jabllanoviq (Aleksandar) po bëni cirk, kështu që ulu ose dil jashtë”, ia ktheu Stojanoviq.
Ndërkohë, Petroviq thumboi sërish Stojanoviqin, duke i thënë se “ti ke dalë nga zarfi, nuk ke vota të popullit. Kur i merr votat, eja këtu”.
Pas acarimeve në sallë takimi është mbyllur për mediat.
Ndonëse është raportuar se Jabllanoviq është riemëruar në postin e kryetarit të “Srpska”-s deri më tani nuk ka një vendim zyrtar të këtij subjekti. /tesheshi.com/
