Atë që s’e bëri më 21 qershorin e vitit që shkoi, Lulzim Basha po e synon ë zgjedhjet e afërta të 11 shtatorit në Peshkopi.
Kandidon për kryetar bashkie një figurë të lartë politike, duke vënë që në fillim qëllimin e qartë për ta rimarrë Dibrën, që do të ishte për të një trofe i fortë politik.
Pas skandalit të Shukri Xhelilit, opozita normalisht që më shumë shanse për t’i fituar zgjedhjet e pjesshme, por caktimi i kreut të listës së deputetëve si kandidat për bashkinë, tregon një synim për ta pasur sa më të sigurtë triumfin.
Ndërsa PS-ja po gjen një figurë me reputacion human për të rregulluar sadopak imazhin shkatërrimtar që i dha Shukri Xhelili me video-skandalin seksual, opozita i është përgjigjur me një kandidaturë politike, që tregon se Lulzim Basha do ta përdorë 11 shtatorin si një nxemje për zgjedhjet parlamentare të 2017-ës.
Dhe në fakt PD-së i nevojitet shumë një rezultat pozitiv pas dy humbjeve radhazi dhe një sinjali jo shumë të fortë për 2017-n.
Sherefedin Shehu është një figurë politike e PD-së, ku që në vitin 2005 kur është emëruar në një post të lartë në qeveri si zv.ministër i Financave nuk është sulmuar asnjëherë.
Një ekspert ekselent i fiskut dhe i financave publike që ka dhënë mësim edhe në Universitetin e Ilinois-it në SHBA.
I gjithë “revolucioni fiskal” që zbatoi Ridvan Bode pas 2006-ës dhe që pati sukses të menjëhershëm në mbledhjen e të ardhurave, kishte brenda dorën e Sherefedin Shehut.
Kështu, lëvizja me kandidaturën e tij në Dibër është një vendosmëri reale për ta fituar bashkinë Dibër.
Por a i ka të dhënat z.Shehu për të administruar një bashki si Dibra, a më saktë thjesht një bashki, ku ngërthehen shumë sfida e jo vetëm ato me natyrë financiare?!
Me reformën administrative, Dibra përmbledh gjithë territorin e krahinës, që nga kufiri me Kukësin dhe deri në kufirin me Bulqizën.
Territori është i madh dhe ka rritur peshën politike të saj.
Por megjithatë është gjithsesi një provincë me mikrorealitete më shumë lokale sesa kombëtare.
Sherefedin Shehu vërtet ka dhënë prova në hartimin e politikave dhe drejtimin e një sektori të rëndësishëm siç është fisku në ministrinë e Financave, çka i rrit atij pikë në garën për Peshkopinë, por gjithsesi ai nuk është një administrator i mirëfilltë.
Ai, që prej vitit 2009 është kreu politik i Partisë Demokratike në Dibër.
Si kryetar i listës ai respektohet gjithsesi nga dy krahët rivale të PD-së, nga kryetari i degës Rrahim Kaleci dhe ish-kryetari i baskisë Ilir Krosi.
Këto dy lobime janë shumë kundërshtare me njëra-tjetrën dhe fitorja e Shukri Xhelilit me një rezultat të ngushtë më 21 qershor 2015, ishte edhe rezultat i kësaj lufte.
Me vendosjen e Sherefedin Shehut, kjo përplasje shuhet dhe beteja për Dibrën merr një karakter të pastër politik.
Pra deri këtu ok. Por po flasim për koncept menaxhimi, për vizionin dhe energjinë që kërkon sot drejtimi i një krahine të tërë, për të bërë të mundur lënien e gjurmëve të dukshme, për ata që jetojnë sot e për brezat që do të vijnë. Dhe kandidati Shehu sikur nuk e jep një rrezatim të tillë.
Sa për aspekte të tjera, Shukri Xhelili do ishte i nderuar po t’i sillte kafenë e mëngjesit në zyrë Sherefedinit, apo t’i kryente ca shërbime të tjera. /tesheshi.com/
