“…nuk kemi trafikantë të proceduar dhe të arrestuar, por vetëm fakirët që punojnë si skllevër nëpër plantacione” – ishte kjo një ndër frazat e deklaratës për shtyp të kreut demokrat, Basha si reagim ndaj të dhënavë të policisë shqiptare dhe Guarda Di Finanza-s italiane, mbi sasinë e shkulur të kanabisit në gjithë territorin e vendit. Dhe në fakt, në gjithë atë çfarë thuhej deklaratë, ku dominonin kalkulimet shifrore me mbledhje e zbritje, ajo çfarë mbetet ende mister në gjithë gjoksrrahjen qeveritare mbi kanabisin e korrur dhe që përbën “firon” më të madhe, është pikërisht moskapja e asnjë “koke” e gjithë kësaj industrie që vetëm një sektor e ka tek parcelat, tek ato që duken.
Këtë e ka thënë vetë kryeministri Rama, ku, teksa komentonte Lazaratin, si për ta heroizuar akoma dhe më tepër aksionin e qeverisë së tij kundër fshatit legjendar të drogës, thoshte (në fakt e thotë edhe tani), se Lazarati ishte një bankë parash deri dhe për media në Tiranë.
Pra që do të thotë se qeveria ka arritur t’i pikasë sektorët e tjerë, i di se kush ushqehej, kush përfitonte dhe se kush e mbronte Lazaratin, ndërkohë që e vetmja figurë më të cilën u identifikua ajo industri me rrënjët të thella, në daç në shtet, në daç në politikë e në daç në media, ishte personazhi me emrin Gate Mahumtaj. Mos qesh po të duash…
Dhe gjersa ndodhi kështu, nuk ka asgjë për t’u habitur që Lazarati të zhvendoset në të tjera terrene. Mjafton dhe fakti që, në luftën kundër kanabisit serviret si e angazhuar vetëm policia, ndërkohë që ajo duhej të ishte vetëm ekzekutuese e një pune, ose misioni më saktë, që në fakt i takon shumë më tepër SHISH-it. Eshtë ky institucioni që duhet të udhëheqë betejën më drogën, gjithnjë nëse qeveria e ka me “besë burri” këtë çështje.
Dhe, nëse akoma nuk do arrijmë të shohim njerëz të kollarisur nën pranga, po po të kollarisur, të cilët mund të jenë shumë të afërt për ne, VIP-a siç u themi, nga politika ose përgjithësisht nga jeta publike, droga do vijojë të prodhojë shifra pa fund, meqë nuk do ketë kurrë të ndalur në kultivim e trafikim njëkohësisht. Ndaj dhe shifrat e servirura janë një hiç. Tek e fundit, aritmetika e atyre që janë pjesë e kësaj industrie, është me tregues komplet ndryshe nga ajo që servir qeveria. Ndoshta duhet të jesh pjesë e saj që ta kuptosh.
Nga ana tjetër, nëse qeveria e ka vërtet kauzë jo-teatrale luftën kundër drogës, do i kërkonte opozitës nënshkrimin e një pakti të përbashkët, historik në llojin e vet, për ta luftuar drogën si një front i vetëm. Kështu siç kanë ardhur punët, droga sot është shndërruar në armikun nr.1 të shoqërisë. Ajo po vë në diskutim themelet e shtetit, po trondit kolonat e nevojshme ku mbahet një shoqëri, e është kthyer po ashtu në një kërcënim kombëtar. Nëse do e bënte këtë, edhe politikisht do ishte më e larë. /teheshi.com/
