Filippo Grandi, drejtuesi i ri i Agjencisë së OKB-së për Refugjatët, ka dhënë dje konferencën e tij të parë për shtyp që prej marrjes së detyrës më 1 janar.
“UNHCR-ja po lundron në ujëra jashtëzakonisht të vështira,” ka thënë ai, duke kërkuar përpjekje më të mëdha diplomatike për zgjidhjen e konflikteve që i detyrojnë njerëzit të lënë vendin e tyre.
Duke folur mbi arritjen e mbi një milion refugjatëve dhe emigrantëve në Europë gjatë vitit të shkuar, Grandi u shpreh se do ta nxiste Bashkimin Europian të ndiqte një qasje të bashkërenduar dhe kohezive në trajtimin e njerëzve që kërkojnë strehë e siguri.
Ai e bëri të qartë se pjesa tjetër e botës po e ndiqte me vëmendje sjelljen e Europës ndaj refugjatëve. Nëse Europa ngre barriera e mbyll dyert, deklaroi Filippo Grandi, po ashtu do të bëjë dhe pjesa tjetër e botës.
“Ardhja masive e refugjatëve në Europë ia ka hapur sytë kësaj pjese të pasur të botës për faktin se refugjatët kanë nevoja të mëdha që nuk janë plotësuar.”
“Europa ka qenë tradicionalisht një kontinent që u ka treguar vendeve të tjera se çfarë të bëjnë në lidhje me azilin, u ka kërkuar vendeve jashtë Europës të pranojnë refugjatë.”
Grandi ka kujtuar në fund se në Europë gjendej aktualisht më pak se 10 për qind e popullsisë refugjate të botës. /tesheshi.com/
