Një takim shumëpalësh do të zhvillohet këtë të shtunë në Lozanë të Zvicrës, në përpjekje për gjetjen e një zgjidhjeje për krizën siriane.
Njoftimi është dhënë nga ministri i Jashtëm rus, Sergey Lavrov, i cili, duke folur për CNN-in, tha se Rusia dëshironte që vendet me ndikim në krizën siriane të nisnin një raund të ri negociatash për një tjetër armëpushim.
“Ne duam të ketë një takim në këtë format të ngushtë, … jo një tjetër debat të ngjashëm me Asamblenë e Përgjithshme,” citohet ai të ketë thënë.
Ndërsa një njoftim i Ministrisë së Jashtme ruse vinte në dukje, “Sipas marrëveshjes midis ministrit të Jashtëm rus, Sergey Lavrov, dhe sekretarit amerikan të Shtetit, John Kerry, takimi i ministrave të jashtëm të Rusisë, SHBA-ve, e të shteteve kyç rajonale, për të shqyrtuar hapat e mëtejshëm të mundshëm për të krijuar kushtet për zgjidhjen e krizës siriane, do të zhvillohet në Lozanë më 15 tetor.”
Siç bën të ditur Russia Today, veç Kerry-t dhe Lavrov-it, në takim do të marrin pjesë dhe shefat e diplomacisë së Arabisë Saudite, Turqisë, Katarit dhe Iranit.
Një burim i Departamentit të Shtetit e ka konfirmuar takimin për agjencinë e lajmeve AFP: “Mund ta konfirmojmë Lozanën. Lozana do të jetë një takim me pjesëmarrësit kyç rajonalë, si dhe me Rusinë.”
Takimi i së shtunës do të zhvillohet mes një tensioni në rritje midis SHBA-ve dhe Rusisë, ndërkohë që Halepi vazhdon të bombardohet dhe lajmet për viktima civile pasojnë njëri-tjetrin. /tesheshi.com/
