Si pjesë e procesit të normalizimit të marrëdhënieve mes dy vendeve armike të Luftës së Ftohtë, SHBA-të e kanë hequr të premten Kubën nga lista e shteteve që mbështesin terrorizmin.
Nënshkrimi i vendimit nga sekretari amerikan i Shtetit, John Kerry, erdhi 45 ditë pasi administrata e Obama-s e njoftoi Kongresin se synonte heqjen e Kubës nga lista. Ligjvënësit kishin kohën e mjaftueshme për ta parë me kujdes këtë lëvizje dhe për të bërë përpjekje për ta bllokuar, por nuk vepruan kështu.
Ky hap vjen në një kohë që zyrtarët e të dy vendeve po diskutojnë hollësitë për rivendosjen e marrëdhënieve të plota diplomatike, duke përfshirë hapjen e ambasadave në kryeqytetet respektive dhe kthimin e ambasadorëve për herë të parë që prej janarit të 1961-shit, kur amerikanët i ndërprenë marrëdhëniet diplomatike me kubanezët.
Gjithsesi, vendimi i mësipërm do të ketë një ndikim të kufizuar mbi sanksionet ekonomike, ndërsa Kuba gjendet akoma nën efektet e embargos të vendosur prej Kongresit Amerikan prej dekadash.
Presidenti amerikan, Barack Obama, e pati urdhëruar në dhjetor Departamentin e Shtetit ta rishohë praninë e Kubës në listën e terrorit, e të raportohej brenda gjashtë muajve. Obama i shkroi Kongresit në prill, ku nënvizonte se qeveria kubaneze nuk kishte dhënë ndonjë mbështetje për terrorizmin ndërkombëtar në gjashtë muajt e shkuar, e se ajo kishte ofruar siguri që nuk do të mbështeste në të ardhmen akte të terrorizmit ndërkombëtar.
Kuba u bë pjesë e kësaj liste në vitin 1982, me arsyetimin se u jepte përkrahje rebelëve komunistë në Amerikën Latine dhe në Afrikë.
Vetëm Irani, Sudani dhe Siria janë vendet që gjenden akoma në listën e terrorit të SHBA-ve. /tesheshi.com/
