Një ditë më parë, kreu i grupit parlamentar socialist, Taulant Balla, deklaroi tërheqjen e ligjit për mbetjet dhe nismës së kryeministrit Edi Rama për dekoratat, duke premtuar diskutimin e tyre me qytetarët.
Por sot, demokratët i kërkojnë socialistëve që të mos tërhiqen nga ligji për mbetjet, ta sjellin në Kuvend për ta votuar bashkarisht kundër.
Deputeti i PD-së Florion Mima ka kërkuar ardhjen e draftit në kuvend, por për ta rrëzuar me votë.
“Është në nderin tuaj dhe të forcës suaj politike të sillet në parlament dhe të rrëzohet me ligj. LSI ju ka kërkuar referendum. Silleni kërkesën këtu,” tha Mima.
Kryetari i komisionit, socialisti Eduard Shalsi, ka deklaruar se tërheqja nga ligji është bërë për shkak të konfuzionit të krijuar dhe se ligji do të konsultohet gjerësisht me publikun. Shalsi ka qenë pro idesë së propozuar nga LSI-së, se për një çështje të tillë sensitive duhej kryer një referendum.
“Nuk është folur në asnjë moment për plehra dhe mbetje por lëndë të para dytësore. Nuk di si do ta tërheqim në aspektin ligjor, por do të ketë diskutim të gjatë. Ka pasur abuzime dhe manipulime të opinionit publik për këtë nismë. Tërheqja pati përlqimin e të gjitha palëve në komision: PD, LSI dhe PS”, tha Shalsi. /tesheshi.com/
