Serbia, kontratë lobimi në SHBA

Serbia ka nënshkruar kontratë njëvjeçare lobimi me kompaninë njujorkeze të komunikimit KARV, për shërbimet e së cilës do të ndajnë 60 mijë dollarë në vit.

Presidenti i KARV-as, Andrew Frank drejton një ekip proserb që përfshin bashkëpunëtorin e lartë Will Sommer dhe këshilltarët e lartë Adrian Karatnycky dhe Gordon Bardos, Drejtor i Asociuar i Institutit Harriman për Universitetin e Kolumbias.

Bardos ka vite që përfaqëson interesat serbe në Amerikë.

Në vitet e fundit, Serbia ka rritur alokimet financiare për lobim në botë.

Pretendimet e Pacollit

Ish-ministri i Jashtëm i Kosovës, Behgjet Pacolli, disa vite më parë ka pohuar se Serbia ka ndarë 300 milionë dollarë për lobim te shtetet që e kanë njohur pavarësinë e Kosovës për të tërhequr atë vendim.

Pacolli tha se ka informacione sipas të cilave Serbia ka punësuar një ekip prej 20 personash, kryesisht ekspertë të diplomacisë, për të vizituar vende të ndryshme të botës dhe për të lobuar kundër Kosovës.

“Nuk ka asnjë shtet në kontinentin afrikan ku Serbia të mos ketë një delegacion që lobon kundër pavarësisë së Kosovës”, tha Pacolli. /tesheshi.com/