Shtëpia e Skënder Agollit, e cila është djegur gjatë luftës nga forcat ushtarako-policore serbe e që gjendet në rrugën ‘Vllada Çetkoviç’ në veri të Mitrovicës, tani më është rrafshuar për tok nga një kompani serbe e Zveçanit.
Rrafshimin e shtëpisë e ka konfirmuar vetë pronari dhe policia e Kosovës në veri të Mitrovicës, ndërsa që punimet me urdhër të Gjykatës Themelore të Mitrovicës, janë ndërprerë.
Skenderi Agolli i ka thënë portalit ‘Tesheshi’ se për dëmin që është bërë do të kërkojë kompensim financiar, pasi që shtëpia ka qenë e djegur por ka qenë në gjendje të mirë me mundësi të renovimit.
“Si të gjithë shqiptarët e tjerë të veriut të Mitrovicës që u dëbuam me dhunë nga shtëpitë dhe banesat e tyre edhe unë me familje, pata të njëjtin fat”, ka nisë rrëfimin e tij Skender Agolli për portalin ‘Tesheshi”.
“Ishte ditë e hënë dhe për një moment bie telefoni, më lajmrohet motra e ime nga Mitrovica me një zë bukur të shqetësuar, Skendo, a e ke shitur shtëpinë vallai jem’. Jo, ju përgjigja, nuk e kam shituar as që kam ndërmend ta shes, po dikush ka hyrë me makineri dhe është duke e rrëzuar tërësisht për të ndërtuar një banim shumë katesh”, më ka thënë motra e ime përmes telefonit.
Fatkeqësisht fjalët e motrës ishin të vërteta se dikush po rrënonte shtëpinë time pa më pyetur fare, ndërsa që kishin përhapura lajme se unë shtëpinë e kam shitur dhe se kompania që po kryente rrënimin gjoja se i kishte të gjitha letrat e pronësisë”, ka thënë Agolli.
Pasi që për momentin jetojnë në Prishtinë, mora të gjitha dokumentat e pronësisë dhe erdha në Mitrovicë në policia. Pas denoncimit që bërë, policia ka dalë në vendin e ngjarjës dhe ka ndaluar kompaninë nga Zveçani që të kryejë punë të më tutjeshme”, ka thënë Agolli.
Ai vazhdon më tej rrëfimin e tij se “Nuk jam ndaluar vetëm me kaq, por kam bërë denoncim edhe në Prokurori dhe Gjykatën Themelore të Mitrovicës, të cilët edhe kanë parandaluar vazhdimin e punëve të kompanisë në fjalë.
Në këtë shtëpi familja e ime jeton që nga viti 1968 dhe është pronë e imja dhe e motrës, për këtë kemi të gjithë dokumentacionin e nevojshëm që iu ofruam institucioneve tona në Mitrovicë”, theksoi ai duke folur për “Tesheshi”.
Shtëpia gjendet në pjesën më të bukur dhe më urabane në tërë Mitrovicën, pra në rrugën ‘Vllada Çetkoviç’ me 7.6 hektarë sipërfaqe, por fatkeqësisht kompania serbe bëri rrenimin e tërsishëm të saj.
Kompania serbe ‘Metal’ nga Zveçani, pronë e Rade Steviç ka bërë rrënimin e saj, pa lejen e time e më qëllim të pëvetësimit të pronës.
Agolli vazhdon më tej se “Për këtë dëm që më ka shkaktuar unë kam angazhuar një avokat dhe do të kërkoj damshpërblim, pasi që shtëpia ka qenë në gjendje që të rinovohet e jo të rrënohet”.
“Ka shumë informacione dhe thashethënme rreth shtëpisë sime, por një gjë dihet se kompanin ‘Metal’ nga Zveçani, dikush e ka paguar që të bëjë rrënimin e shtëpisë”, ka thënë Agolli, i cili ka shtuar se nuk më intereson se kush qëndron mbrapa kompanisë ‘Metal’, por nga ajo do të kërkojë kompensimin.
Zhelko Bojiç, shef i seksionit operativ të policisë së Kosovës në veri, i ka thënë portalit ‘Tesheshi’, se një qytetar shqiptarë është ankuar se dikush po i rrëzonte shtëpinë e djegur e cila gjendet në rrugën ‘Vllada Çetkoviç’ në veri të Mitrovicës.
Policia ka dalë në vendin e ngjarjes dhe ka larguar makinerinë e cila është gjendur në oborrin e shtëpisë duke ndërprerë punimet, ndërsa që procedurat rreth kësaj çështje do t’i drejtohen institucioneve të drejtësisë”, ka thënë Bojiç.
“Ata që kanë shkeluar ligjin do të përgjigjen para drejtësisë, ndërsa që policia i ka kryer të gjitha proceduarat konform ligjit, kompania ‘Metal’, pra pronari i saj do të ndiqet për tri vepra penale që ka bërë”, kanë thënë zyrtarë të policisë nga veriu i Mitrovicës.
Pronari i kompanisë ‘Metal’ nga Zveçani, Rade Steviç, njihet si bashkë punëtor i afërt i njeriut numër dy të krimit të organizuar të veriut të Mitrovicës dhe Kosovës Millan Radonjçiç” ka nënvizuar burimi i portalit.
/tesheshi.com/
