Qëndrimi i drejtuesve të sportit në Serbi karshi sportit kosovar nuk po shkon duke u zbutur. Serbët vazhdimisht punojnë kundër përfaqësimit të sportistëve në arenën ndërkombëtare, dhe qëndrimi i tyre anti-Kosovë mund të shkojë vetëm duke u forcuar. Ide të tilla janë dhënë të enjten në tubimin e gjashtë në kuadër të dialogut të brendshëm të Serbisë për Kosovën.
Ky dialog është iniciuar nga presidenti i Serbisë, Aleksandër Vuçiç, me qëllim për të gjetur zgjidhje për pyetjet rreth Kosovës. Të enjten e kishin radhën drejtuesit sportivë për të dhënë idetë e propozimet e tyre, shkruan “Koha Ditore”.
Drejtuesit e federatave sportive të Serbisë kanë kërkuar që sugjerimi i qeverisë së Serbisë se si të sillen sportistët dhe organizatat sportive serbe në rastet kur janë organizatorë të ngjarjeve ndërkombëtare apo në rastet kur garojnë kundër kosovarëve në ngjarje ndërkombëtare, të përmirësohet dhe të kthehet në vendim.
Kjo nënkupton ashpërsim i qëndrimit ndaj sportit të Kosovës. Komuniteti sportiv serb ka kërkuar që qeveria e Serbisë t’iu thotë qartë se si të sillen në raport me sportistët nga Kosova. /tesheshi.com/
