Një marrëveshje midis Kievit dhe Moskës për të zhbllokuar eksportet e grurit ukrainas mund të hapë rrugën për një armëpushim të mundshëm, tha ish-kancelari gjerman Gerhard Schroeder, një mik i presidentit rus Vladimir Putin.
Anija e parë me grurë që nga fillimi i pushtimit rus të Ukrainës mbërriti me sukses në bregdetin turk të martën dhe do të inspektohet të mërkurën.
“Lajmi i mirë është se Kremlini dëshiron një zgjidhje të negociuar”, tha Schroeder për javoren Stern dhe televizionin RTL/ntv të mërkurën pas takimit me Putinin në Moskë javën e kaluar, raportoi Reuters.
“Suksesi i parë është marrëveshja për eksportet, ndoshta kjo mund të shtrihet ngadalë në armëpushimin”, tha ish-lideri i socialdemokratëve gjermanë, Kancelar nga viti 1998 deri në 2005, i cili kritikoi luftën në Ukrainë, por refuzoi të dënojë Putinin.
Ndërkohë, Moska akuzoi Shtetet e Bashkuara se janë përfshirë drejtpërdrejt në luftë, jo vetëm përmes dërgesave të armëve.
Ministria ruse e Mbrojtjes pretendon se deklaratat për Telegrafin britanik të Vadim Skibitsky, një oficer i inteligjencës ushtarake ukrainase, tregojnë se Uashingtoni është pjesë e konfliktit.
Skibitsky tha për mediat britanike se oficerët e inteligjencës amerikane dhe ukrainase konsultohen përpara sulmit dhe se Uashingtoni vë veton ndaj disa objektivave, por se zyrtarët amerikanë nuk japin informacion të drejtpërdrejtë për objektivat.
Pretendimet e Rusisë për shkatërrimin e HIMARS-it
“E gjithë kjo dëshmon qartë se Uashingtoni, në kundërshtim me pretendimet e Shtëpisë së Bardhë dhe Pentagonit, është i përfshirë drejtpërdrejt në konfliktin në Ukrainë”, tha të martën Ministria ruse e Mbrojtjes.
“Qeveria Biden është drejtpërdrejt përgjegjëse për të gjitha sulmet me raketa, të autorizuara në Kiev, në zonat e banuara dhe infrastrukturën civile në pjesë të populluara të Donbass dhe rajone të tjera që kanë rezultuar në vdekje masive civile.”
Uashingtoni nuk i është përgjigjur ende këtyre akuzave, por Pentagoni ka hedhur poshtë pretendimet e Moskës se ka shkatërruar gjashtë sisteme raketore amerikane HIMARS. /tesheshi.com/
