Ish-presidenti francez, Nicolas Sarkozy, që synon të rikthehet edhe një herë në të njëjtën detyrë, ka deklaruar se, nëse fiton në zgjedhjet e vitit tjetër, ai do t’i ofrojë një mundësi Britanisë për ta prapësuar votën e Brexit-it me negociimin me Gjermaninë të një marrëveshjeje të re për BE-në.
Kandidati në zgjedhjet presidenciale në Francë tha se marrëveshja e re ka për t’u përqendruar në reformimin e zonës Shengen, në kufizimin e prerogativave të Komisionit Europian, në integrimin e mëtejshëm të eurozonës, e në ndalimin e bisedimeve të anëtarësisë me Turqinë.
Nicolas Sarkozy premtoi se po të fitonte në zgedhje do të shkonte në Britani me projektin e një traktati të ri të BE-së, për t’u thënë britanikëve, “Ju dolët, por ne kemi një marrëveshje të re në tavolinë, kështu që ju keni mundësi për të votuar përsëri.”
“Por këtë herë jo mbi Europën e vjetër, por mbi Europën e re,” ka vijuar pretenduesi për postin presidencial në Francë. “Doni të qëndroni? Nëse po, shumë më mirë. Sepse unë nuk mund të pranoj të humb ekonominë e dytë më të madhe të Europës ndërsa po negociojmë me Turqinë për anëtarësinë e saj në BE.”
Sarkozy do të thoshte menjëherë pas referendumit britanik se donte një traktat të ri të BE-së, si dhe pezullimin e negociatave me Turqinë për pranim në BE. /tesheshi.com/
