Vetëm njëzet e kusur minuta arriti të rezistonte Argjentina e Lionel Messi-t ndaj një Brazili dukshëm në formë.
E vlefshme për kualifikueset e Kupës së Botës së dy viteve më pas, supersfida Brazil – Argjentinë pati për protagonistë vendasit, që arritën një fitore të pastër.
Skuadra udhëtuese kishte një nisje të mirë të lojës, falë aftësive të Messi-t, me disa momente fragmentare pozitive. Goli i shkëlqyer i Coutinho-s në minutën e 25-të do të përcaktonte rrjedhën e mëpastajme të lojës.
Aguero, ashtu siç qe paralajmëruar, qe lënë në stol, me një dyshe sulmuese në fushë të përbërë nga Messi e Higuain. Por dhe kur ai u bë pjesë e lojës në 45 minutat e dyta, në një skemë tashmë me tre sulmues, përsëri asgjë nuk ndryshoi në të mirë të Argjentinës.
Pika më e dobët e argjentinasve ishte mbrojtja: e ngadaltë, pa ritëm, anemike. Ekipi, megjithatë, për asnjë moment nuk funksionoi si një i tërë.
Neymar thelloi shifrat për brazilianët në mbarim të pjesës së parë, e Paulinho e çoi rezultatin në 3-0 në minutën e 58-të.
I vetmi lajm i mirë për Argjentinën qe humbja në shtëpi e Paraguajit ndaj Perusë, 1-4, që ia kurseu zbritjen në vend të shtatë.
Në tre takimet e tjera, Kolumbia e Kili u ndanë në paqe, në një ndeshje të mbyllur pa gola, Uruguaji fitoi 2-1 ndaj Ekuadorit, e Venezuela shkatërroi Bolivinë, duke e mposhtur 5-0. /tesheshi.com/
https://youtu.be/ycQo06XmynU
