Qeveria tuniziane ka reaguar ashpër pas deklaratës së ministrit të ri të Brendshëm italian, Matteo Salvini, ndaj qeverisë së vendit afrikan.
Tunizi zyrtar ka thirrur urgjent ambasadorin e tij nga Roma, pasi Salvini në një takim publik akuzoi Tunizinë se “ka dërguar në Itali përbindsha”.
“Shprehim shqetësimin e madh ndaj frazave të tmerrshme të dala nga goja e ministrit të një vendi mik”, bëhet e ditur në deklaratën e qeverisë tuniziane.
Ministria e Jashtme e Tunizit zyrtar thekson se “Këto deklarata nuk shprehin në asnjë rresht, përpjekjen e gjatë dhe të fortë të dy vendeve tona për të frenuar emigracionin e paligjshëm dhe për të luftuar organizatat e krimit të organizuar që ushqejnë trafiqet”.
Salvini ka qenë sot në mëngjes në Siçili ku ka lëshuar një deklaratë të fortë për emigracionin.
Ministri i Brendshëm italian tha se nëse Bashkimi Europian nuk do të mbështesë vendin e tij në luftën ndaj krimit të organizuar, atëherë Roma do të ecë sipas mënyrës së saj.
Deklarata u bë dy ditë pas mbytjes në det të një anijeje me 85 tunizianë. E pikërisht këtu ka ardhur dhe “kumbulla” e liderit të Lega-s, sot numri dy i qeverisë italiane.
“Tunizia eksporton shpesh përbindsha”, tha Salvini në mëngjes, ndërkohë tani pasdite pas notës së qeverisë së vendit afrikan deklaroi se është i gatshëm të takojë menjëherë homologun tunizian.
Salvini ndërkaq ka bërë të ditur se nuk do të marrë pjesë në samitin e ministrave të Brendshëm të BE-së në Luksemburg, me sebepin se është i impenjuar në senat me seancën e votëbesimit të qeverisë. /tesheshi.com/
