Vendet që përpiqen të sigurojnë dozat e tyre të vaksinës po kontraktojnë me kompani të barnave që rrezikojnë furnizimin e programit global COVAX për vendet e varfra dhe me të ardhura të mesme, tha Organizata Botërore e Shëndetësisë.
“Vendet ende po arrijnë marrëveshje që do të rrezikojnë furnizimin e COVAX, pa dyshim,” tha këshilltari i lartë i OBSH Bruce Aylward, raporton Reuters.
Organizata Botërore e Shëndetësisë, një nga udhëheqësit në programin COVAX për të siguruar vaksina në vendet e varfra, u ka bërë thirrje prej kohësh vendeve të pasura për të siguruar një shpërndarje të drejtë të vaksinave.
“Ne kemi bërë përparim të madh. Por ky progres është i brishtë. Ne kemi nevojë për të përshpejtuar shpërndarjen e vaksinave COVID-19 dhe nuk mund ta bëjmë atë nëse disa vende vazhdojnë t’u drejtohen prodhuesve të vaksinave, tek të cilat COVAX mbështetet”, tha Drejtori i Përgjithshëm i OBSH-së Tedros Adhanom Ghebreyesus.
Ai gjithashtu u bëri thirrje vendeve të braktisin rregullat e pronësisë intelektuale, për të lejuar vendet e tjera të bëjnë vaksinat më të shpejta. /tesheshi.com/
