Moska zyrtare ka vendosur në Bosnjë, praktikisht në Republika Srbska, terrenin ku do të luhet akti i fundit i dramës së influencës ruse në Ballkan, një masë bronxi si një mesazh i qartë politik.
Një ceremoni në një fshat të vogël ku u prodhuan çetnikët e genocidit të tmerrshëm ndaj bosnjakëve, Rusia ka vendosur shtatoren e carit rus Nikolla II, njeriut që hyri i pari në Luftën e Parë Botërore, pikërisht në Bosjë, por që më pas u pushkatua nga Garda Revolucionare e Vladimir Iliç Leninit në Revolucionin e Tetorit që ne dikur e festonim më 7 nëntor.
Dhe pikërisht këtë fantazmë të së kaluarës së tmerrshme dhe totalisht të palavdishme jo vetëm për ballkanasit por edhe për rusët vetë, siç ishte Lufta e Madhe që shkaktoi miliona viktima e shkatërrime, Moska po mundohet ta rikthejë me nota melodramatike.
Ambasadori rus në Bosnjë, Peter Ivancov, i ka kujtuar Beogradit nga një fshat i Republika Srbska se “Ne rusët kurrë nuk e harruam popullin serb, e përkrahëm atë edhe në ditët më të vështira tonat, madje deri duke u vetëflihuar” –
Duke nënkuptuar kështu zhdukjen e të gjithë familjes perandorake ruse nga ana e bolshevikëve, të cilët u financuan nga gjermanët.
Ceremonia zyrtare e inagurimit të shtatores së Car Nikollës II u zhvillua në fshatin Riteshiç të Republika Srbska, që u kthye në një lloj nostalgjie por edhe ristartim i filozofisë perandorake të Moskës në Ballkan.
I dërguari i Miroslav Dodik, njeriut nr.1 i Republika Srbska dhe aleati më i ngushtë i Putinit në Ballkan, Sinisha Karan, deklaroi prerë e qartë në ceremoni që “serbët nuk mund të kenë kurrë paqe pa Rusinë dhe kjo duhet të jetë e qartë nga kushdo”, tha Karan që i ka drejtuar menjëherë telat nga Beogradi.
“Ne e dimë se miqësia jonë po vuan nga ndikime të mëdha: Perëndimi ka të njëjtët probleme që kanë pasur me ne, ndaj ne duhet të zgjedhim atë që është më afër zemrës dhe jo stomakut”, tha njeriu i Dodik,duke i bërë thirrje serbëve që të mos mbështesin kursin e ri të Beogradit.
Pra Moska po përdor një metodë ndryshe të influencës, atë të nostalgjisë melodramatike, duke kujtuar pikërisht Luftën e Parë Botërore, ku sipas zyrtarëve rusë, ata hynë në konflikt vetëm për Serbinë dhe jo vetëm për vete.
Ketë e tha hapur ambasadori rus në Sarajevë, gjatë evenimentit nostalgjik për Car Nikollën II.
Nga Beogradi kishte ardhur në eveniment vetëm Ministri i Energjisë Petar Gjokic, nga partia e Daçiçit, i cili në emër të shefit të tij që njihet si filorusi i fundëm në kabinetin serb, tregoi së nuk do të braktiset miqësia me Moskën.
“Ka disa nga ne që duan ta prishin këtë miqësi shekullore por nuk do t’ja dalin dot”, tha Gjokiç.
Kisha serbe e ka kthyer në Shenjt Nikollën II dhe e konsideron martirizimin e tij si një shkak për të mbrojtur popullin serb.
Në këtë zonë të Republika Srbska po ndërtohet një kompleks i madh fetaro-politik që të jetë manastir por edhe sallë konferencash dhe hotel për të shërbyer si qendër pansllave dhe lidhje permanente me Moskën.
Paratë kanë ardhur natyrisht nga Rusia, nëpërmjet disa kanalesh shoqata të fshehta e misterioze por që mbërrijnë direkt në Kremlin.
Përgatiti Ylli Pata – /tesheshi.com/
