Moska dënoi vendimin e Presidentit të SHBA Donald Trump për të njohur sovranitetin e Marokut mbi Saharanë Perëndimore, duke vlerësuar se ai shkon plotësisht përtej ligjit ndërkombëtar.
“Ajo që kanë bërë amerikanët me këtë është një vendim i njëanshëm, i cili shkon plotësisht përtej kornizës së ligjit ndërkombëtar,” tha Zv/ministri i Jashtëm rus Mikhail Bogdanov.
Ai shtoi se vendimi nuk respektonte “vendimet e rezolutave të Këshillit të Sigurimit të Kombeve të Bashkuara, me të cilat ranë dakord amerikanët”.
Për shkak të çështjes së statusit të Saharasë Perëndimore, një mosmarrëveshje midis Marokut dhe Frontit Polisario ka vazhduar për dekada, raporton AFP.
Polisario, lëvizja për pavarësinë e Saharasë Perëndimore, po bën thirrje për një referendum mbi vetëvendosjen, ndërsa Maroku, i cili kontrollon më shumë se dy të tretat e këtij territori të madh shkretëtirë, po propozon një plan të pavarësisë nën sovranitetin e tij.
Më parë, Izraeli dhe Maroku, me ndërmjetësimin e Shteteve të Bashkuara, ranë dakord për normalizimin e marrëdhënieve dhe Presidenti i SHBA Donald Trump, si pjesë e marrëveshjes, ra dakord të njohë sovranitetin e Marokut mbi Saharanë Perëndimore.
Një deklaratë e Shtëpisë së Bardhë tha se Trump përsëriti mbështetjen e tij për propozimin e Mbretit Marok Mohammed VI për autonomi për Saharanë Perëndimore si e vetmja zgjidhje afatgjatë. /tesheshi.com/
