Moska njoftoi sot se ka ndërmarrë masa kundër SHBA-ve, si përgjigje ndaj miratimit të sanksioneve të reja të vendosura ndaj Rusisë, dhe ka urdhëruar Uashingtonin që të zvogëlojë numrin e personelit diplomatik.
“Ne i sugjerojmë palës amerikane që numri i personelit mbështetës diplomatik në Ambasadën amerikane dhe konsulatën e përgjithshme në Moskë të reduktohet në numër të njejtë me numrin e diplomatëve rusë dhe stafit teknik në SHBA”, thuhet në një deklaratë të ministrisë së jashtme ruse, raportojnë agjencitë, ndërsa siç raporton “Sputnik”, kjo do të thotë se numri i përgjithshëm i personelit në objektet diplomatike dhe konsullore të SHBA do të reduktohet në 455.
Senati amerikan me shumicë dërrmuese të votave, mbrëmë miratoi një pako të sanksioneve të reja ekonomike kundër Rusisë, Iranit dhe Koresë së Veriut.
SHBA do të jetë e detyruar të tërheqë nga Rusia qindra diplomatë, si hakmarrje nga ana e Moskës ndaj vendosjes së sanksioneve të reja kundër Rusisë, raporton agjencia e lajmeve “Interfax”.
“Nuk po flasim për dhjetra, por qindra diplomatë dhe personel teknik të cilët janë në misione diplomatike në Rusi”, citoi agjencia një burim të paidentifikuar, njoftoi Reuters./tesheshi.com/
