Qeveria turke ka pezulluar ndërtimin e gazësjellësit “Rrjedha Turke” që do të furnizonte Europën me gaz rus, pasi Moska i ka vënë kusht Ankarasë që gazi të shkonte drejt Greqisë pa u përdorur në Turqi.
Turqia nuk e ka pranuar kërkesën e rusëve dhe menjëherë ka vendosur që gazësjellësi të mos ndërtohet.
Sipas informacioneve thuhet se projekti “Rrjedha Turke”, i cili u lançua nga vetë Presidenti i Rusisë, Vladimir Putin është pezulluar për shkak të mos progresit në të.
Një shenjë e këtij pezullimi ishte edhe mos firmosja nga ana e firmës ruse të gazit, Gazprom të një ulje çmimi për Turqinë e cila ishte parashikuar në takimet e mëparshme mes palëve.
Turqia e cila është klienti i dytë më i madh i gazit rus pas uljes së kërkesës për këtë gaz nga BE-ja si dhe pas uljes së çmimit të gazit në rang global ka kërkuar nga pala ruse uljen e çmimit të gazit. Turqia kërkon që këtë çështje ta mbajë jashtë bisedimeve për ndërtimin e “rrjedhës turke”.
Ndërkohë një nga problemet e pazgjidhura në lidhje me tubacionin e gazit i cili pritet të transportojë gazin rus drejt Turqisë dhe më pas në Evropë është ai i lidhjes ose jo i këtij tubacioni me tubacionet e tjera të cilat planifikohen të kalojnë në Turqi.
Ndërkohë që Rusia kërkon që rrjedha turke të shkojë pa u futur në sistemin e gazit të Turqisë drejt Greqisë, Turqia kërkon që ky tubacion të lidhet edhe me sistemin e furnizimit vendas.
Në një deklaratë më 14 korrik Ministri i Energjisë dhe Burimeve Natyrore, Taner Yıldız tha se Turqia nuk e konsideron veten vetëm si një shtet transit të këtij gazi, por edhe si një qendër energjetike. Yıldız tha se Rusia ka ardhur me një tjetër kërkesë dhe se dy vendet duhet të lëvizin për të mirën e tyre.
Nga ana tjetër Ministri i Energjisë së Rusisë, Aleksandr Novak ditën e djeshme në një deklaratë tha se para nënshkrimit të një marrëveshjeje mes Rusisë dhe Turqisë projekti nuk do të nisë me zbatimin. /tesheshi.com/
