Gjermania do të organizojë në qershor takimin e G7-s, me pjesëmarrjen e udhëheqësve nga Shtetet e Bashkuara të Amerikës, Britania, Franca, Kanadaja, Italia dhe Japonia, por ashtu siç ndodhi vitin e shkuar, Rusia do t’i ketë dyert e mbyllura.
Këtë e ka bërë të ditur ministri gjerman i Punëve të Jashtme, Frank-Walter Steinmeier, i cili ditën e djeshme u është përgjigjur negativisht thirrjeve të partisë radikale E Majta për ta ftuar Vladimir Putin-in në takimin e këtij viti të grupit të shtatë fuqive industriale.
“Nuk është në interesin tonë ta izolojmë Rusinë në planin afatgjatë. Por nuk mund të sillemi sikur asgjë të mos ketë ndodhur pas aneksimit ilegal të Krimesë,” i tha Steinmeier së përditshmes Die Welt.
“Kthimi në Grupin e të Tetëve do të vijë nëpërmjet respektimit të unitetit të Ukrainës dhe vënies në zbatim të detyrimeve ruse në marrëveshjen e Minskut,” vijoi ai.
Gregor Gysi, drejtuesi parlamentar i partisë E Majta, ka shprehur mendimin se prania e Rusisë është e nevojshme në zgjidhjen e krizave ndërkombëtare, e prandaj G7-a duhet të kthehet përsëri në G8, por pa gjetur përgjigje pozitive.
Ministri gjerman i Punëve të Jashtme e bëri të qartë se do të ishte e dëshirueshme që Rusia të qe më e përfshirë në ndihmën për zgjidhjen e konflikteve në Siri, Jemen dhe Libi, por i mëshoi vendimit se G8-a do të mbetej e mbyllur tani për tani.
Udhëheqësit e G7-s e shprehën vitin e shkuar protestën ndaj aneksimit nga Rusia të rajonit ukrainas të Krimesë duke mos e ftuar Putin-in në një takim të tyre.
Përjashtimi pritet të vazhdojë ndërsa luftimet dhe gjakderdhja nuk kanë të ndalur në pjesën lindore të Ukrainës edhe pas marrëveshjes për armëpushim të nënshkruar dy muaj të shkuara. /tesheshi.com/
