I mbërthyer në valën e entuziazmit, Hasan Ruhani, presidenti i Iranit, ka deklaruar se vendi i tij do t’u përmbahet angazhimeve të veta në marrëveshjen “historike” bërthamore të arritur në Zvicër. Ajo hap një “faqe të re” për vendin, kanë qenë fjalët e tij vijuese.
Marrëveshja përfundimtare do të varet nga përmbushja e angazhimeve prej të dyja palëve, bëri të ditur Hasan Ruhani të premten në një fjalim të transmetuar në televizion.
“Nëse pala tjetër përmbush premtimet e saj, ne do të përmbushim premtimet tona,” qartësoi ai një ditë pasi Irani dhe pesë anëtarët e përhershëm të Këshillit të Sigurimit të OKB-së arritën një marrëveshje kornizë.
“Ca mendojnë se ne ose duhet të luftojmë me botën, se duhet t’u dorëzohemi fuqive globale,” por ka një “rrugë të tretë”, ajo e përfshirjes në nivel ndërkombëtar.
Iranianët nuk kërkojnë të mashtrojnë bashkësinë ndërkombëtare, dhe do t’u qëndrojnë premtimeve që bënë, shtoi presidenti.
Krejt i ndryshëm ka qenë reagimi i menjëhershëm i Benjamin Netanyahu-t, kundërshtarit më të ashpër të marrëveshjes.
“Izraeli kërkon që çdo marrëveshje përfundimtare me Iranin të përfshijë një angazhim të qartë dhe të pamëdyshtë iranian ndaj të drejtës së Izraelit për të ekzistuar,” ngulmoi kryeministri izraelit, i cili sapo ka fituar rishtas zgjedhjet.
“Izraeli nuk do të pranojë një marrëveshje që e lejon një vend që betohet të na shfarosë të zhvillojë armë bërthamore.” /tesheshi.com/
