Shefi ekzekutiv i kompanisë farmaceutike, “Turing Pharmaceutical”, shqiptari Martin Shkreli është vendosur nën kritika të ashpra në Shtetet e Bashkuara pas vendimit për rritjen e çmimit të një ilaçi jetik për të sëmurët me HIV-AIDS dhe kancer. Çmimi u rrit brenda ditës nga 13 dollarë në 750 dollarë ose në 5 mijë për qind e kjo ka shkaktuar një fushatë të vërtetë zemërimi ndaj vendimmarrësit të kompanisë.
32-vjeçari Shkreli është shef ekzekutiv i kompanisë që tashmë ka blerë monopolin e medikamentit nga “Impax Laboratorikes” për shitjen e ilaçit Daraprim, duke njoftuar njëherësh rritjen stratosferike të çmimit.
Vetëm një vit më parë shqiptaro-amerikani ishte në qendër të përgëzimeve për suksesin e tij në moshë fare të re. Por, vendimi i marrë e ka vendosur atë në syrin e ciklonit.
Mjekët dhe ekspertët thonë se rritja e çmimit është e pajustifikueshme pasi një kurë e plotë mund të arrijë shifrat e 600 mijë $.
Por, vetë Martin Shkreli ka mbrojtur vendimin e tij duke thënë se kompania ka qenë e detyruar të rrisë çmimin e medikamentit për të kryer kërkime shkencore që do të rrisnin efikasitetin e tij dhe për më pak efekte anësore.
“Paratë që do të dalin nga shitjet e këtij ilaçi do të paguajnë për të prodhuar një ilaç më të mirë”, tha Shkreli.
Shoqëria e Sëmundjeve Infektive të Amerikës, shoqata e të sëmurëve me SIDA dhe mjekët kanë shkruar një letër të hapur për Shkrelin ku i kërkojnë kompanisë të rishqyrtojë vendimin. Sipas tyre, rritja e çmimit të medikamentit në fjalë do të thotë vdekje për pacientët që e kanë atë të domosdoshëm. /tesheshi.com/
