Qeveria Rama ka hedhur poshtë vendimin e qeverisë Berisha, në lidhje me festat zyrtare, të cilat bien në fundjavë.
Zëvendës Kryeministri, Niko Peleshi ka bërë me dije ditën e sotme, një nga vendimet e marra në mbledhjen e qeverisë, ku është shprehur se në ditët që festat bien në fundjavë, dita e hënë do të jetë pushim.
“Kur festa zyrtare bie në ditët e pushimit javor, dita e hënë do të jetë ditë pushimi. Kjo vlen edhe për komunitetet fetare. Duke nisur nga e hëna që vjen, e cila është e hëna pas Pashkëve Katolike, do të jetë pushim e hëna për të gjitha festat që janë në fundjavë”,- tha Z. Peleshi.
Ai u shpreh se ky është një stimul për turizmin e brendshëm dhe se në këtë mënyrë respektohet Kodi i Punës, i cili e ka pasur ditën e hënë pushim, kur festat bien në fundjavë.
“Do të mund të pajisim me bonuese, administratorët e shkëlqyer. Bëhet fjalë për iniciativa financiare dhe të tjera”,- ka bërë me dije zv. kryeministri.
Në fund të fjalës së tij, ai kujtoi se kjo nuk është një shaka e datës 1 prill./tesheshi.com/
