Paralajmërimet për përjashtime nga Euro 2016-ta ngjan të mos kenë pirë ujë, pasi skenat e dhunës e të përplasjes së tifozerive nuk janë shmangur as dje, duke patur si epiqendër Lilën.
Gjatë gjithë të mërkurës nuk kanë munguar përleshjet e tifozëve me policinë franceze, e cila ka arrestuar më së paku 36 persona. 16 të tjerë janë dërguar në spital për shkak të plagëve të marra.
Në Lilë ka patur tifozë rusë e sllovakë, për shkak të ndeshjes së ekipeve të tyre në stadiumin e këtij qyteti, por edhe anglezë e uellsianë, që janë gjendur atje teksa Anglia e Uellsi do të takohen sot në Lens.
Në përplasjen me policinë ka patur shumë tifozë anglezë, e mes të arrestuarve kanë qenë si tifozët anglezë ashtu dhe ata rusë. Policia franceze është detyruar të përdorë forcën e gazin lotsjellës.
Siç njofton BBC-ja, errësira e mbrëmjes ka sjellë dhe një përkeqësim në përplasjen mes tifozëve anglezë dhe policisë. Gjithë droja është tani se çfarë do të ngjasë sot, kur tifozët pa bileta ta ndjekin ndeshjen mes Anglisë dhe Uellsit në ekranet e vendosura në qytet.
Dyqanet që shesin pije alkoolike në Lilë janë mbyllur nga pasditja e së martës, për t’u hapur mëngjesin e së premtes, por përsëri është raportuar për shitjen e tyre në disa njësi të vogla tregtimi.
Ka patur dhe një thirrje për tifozët pa bileta që të mos udhëtojnë për takimin mes Anglisë dhe Uellsit. Ndërkaq, një tjetër ditë e trazuar pritet të jetë sot. /tesheshi.com/
