Pasi presidenti rus Vladimir Putin urdhëroi një bllokadë të plotë të nëntokës së uzinës Azovstal, e cila strehon mbrojtësit e fundit të Mariupolit, rreth 2000 ushtarë dhe civilë thuhet se kanë mbetur në kompleksin tunelor të çelikut.
Svyatoslav Palamar, zëvendës komandant i Batalionit Azov, foli prej atyr për BBC-në.
Ai tha se ata kishin zmbrapsur sulme të shumta ruse në këtë bastion të fundit të qytetit. Ai tha se fabrika e çelikut në të cilën ata fshihen tani është rrethuar dhe shkatërruar deri në tokë dhe se civilët kanë mbetur të bllokuar nën rrënoja.
“Unë them gjithmonë se për sa kohë jemi këtu: Mariupol mbetet nën kontrollin e Ukrainës”, tha ai.
Disa burime të paverifikuara kanë shpërndarë në rrjetet sociale se Palamar është vrarë ndërkohë në Mariupol, por deri më tani nuk ka një konfirmim zyrtar nga asnjëra palë.
Pak ditë më parë, Putin urdhëroi ushtrinë e tij të braktiste sulmin e planifikuar të
armatosur në labirintet nëntokësore të mullinjve të çelikut dhe i urdhëroi ata të bllokonin këtë zonë industriale në mënyrë që “miza të mos kalonte jashtë apo brenda”.
Pjesa më e madhe e Mariupolit është rrafshuar plotësisht me tokë gjatë javëve të granatimeve të rënda ruse dhe luftimeve intensive në rrugë. Pushtimi i një porti në Detin Azov është një qëllim kryesor i luftës ruse të atyshme, dhe Putini dëshiron të dërgojë trupat që luftojnë atje për në Dombas sa më shpejt të jetë e mundur.
Mbrëmë, zëvendëskomandanti i Azov-it i tha BBC-së në një video se ushtria ruse qëlloi Azovstal-in nga anijet luftarake dhe se të gjitha ndërtesat përreth fabrikës u shkatërruan plotësisht.
“Rusët po hedhin bomba të rënda për të hedhur në erë bunkerët, duke shkaktuar shkatërrime të mëdha. Ne kemi të plagosur dhe të vdekur në bunkerë. Disa civilë mbeten
të bllokuar nën ndërtesat e shembura,” tha ai në mënyrë dramatike. Kur u pyet se sa mbrojtës ukrainas mbetën në Mariupol, ai u përgjigj shkurt: “mjaft për të zmbrapsur sulmin”.
Ai thotë se civilët janë në vende të ndara larg luftëtarëve. Por ai nuk e di saktësisht se sa civilë ka, sepse disa ndërtesa u shkatërruan dhe luftëtarët nuk mundën t’i arrinin për shkak të granatimeve. Gjithashtu hyrjet në disa prej bunkerëve u bllokuan nga pllaka të rënda betoni që vetëm makineritë e rënda mund të lëviznin.
“Ne mbajmë kontakte me ata civilë që janë në vendet ku mund të arrijmë. Ne e dimë se atje ka fëmijë të vegjël deri në tre muajsh,” tha ai. Ai bëri thirrje që civilët të lejohen të kalojnë të sigurt nga uzina e çelikut, duke u kërkuar vendeve të treta ose një organizmi ndërkombëtar që të garantojnë sigurinë e tyre.
“Këta njerëz tashmë kanë kaluar shumë, përmes krimeve të luftës. Ata nuk u besojnë rusëve dhe kanë frikë nga torturat, vrasjet dhe deportimet në Rusi përmes të ashtuquajturave kampe filtrimi,” tha ai.
Gjithashtu, ai tha se nuk kanë arritur t’i varrosin as të vdekurit.
“Ne po ruajmë trupat e pavarrosur të luftëtarëve tanë që duam t’i varrosim me dinjitet në territorin e kontrolluar nga Ukraina,” tha ai për BBC.
“Sa i përket dorëzimit në këmbim të një dalje të sigurt të civilëve, shpresoj se të gjithë e dimë se me kë kemi të bëjmë. Ne e dimë patjetër se të gjitha garancitë, të gjitha deklaratat e Federatës Ruse janë të pavlera,” përfundoi Svyatoslav Palamar, nr 2 i Batalionit Azov. /tesheshi.com/
