Kristiano Ronaldo është lojtari më i mirë i botës sipas FIFA-s.
Në ceremoninë e ndarjes së çmimeve për vitin 2017, portugezi u votua si më i miri, në rivalitet me Mesin dhe Nejmar. Çmimin portugezit ia dhuruan as më shumë e as më pak, por vetë Diego Maradona dhe Ronaldo Fenomeni brazilian.
Si trajner i vitit u shpall Zinedin Zidan i Realit të Madridit, ndërsa Oliver Zhiru mori çmimin “Pushkash” për golin më të bukur të vitit.
Çmimin për lojtaren më të mirë të botës, e mori holandezja Like Martens.
FIFA përcaktoi edhe 11 lojtarët më të mirë të vitit, sipas reparteve. Xhanluixhi Bufon u vlerësua si portieri më i mirë në botë, Serxho Ramos, Leonardo Bonuci, Marcelo dhe Dani Alves, u zgjodhën si mbrojtja më e mirë e sezonit që po mbyllet. Toni Kros, Luka Modriç e Andres Iniesta, u zgjodhen si mesfushorët më të mirë të planetit, ndërsa Leo Mesi, Kristiano Ronaldo dhe Nejmar, përbënin treshen më të mirë të sulmit. Në përbërjen më të mirë të botës, Ronaldo dhe Mesi janë prezentë për 11 vite rradhazi.
Interesant ishte votimi për tifozerinë më të mirë të vitit, të cilën e fituan në mënyrë surprizë, tifozët e Sëlltikut. /tesheshi.com/
