Me fitoren e thellë të Romës ndaj Sampdorias në “Olimpico” është mësuar dhe emri i skuadrës së fundit të kualifikuar për në çerekfinalet e Kupës së Italisë.
Roma i la pak hapësirë Sampdorias në 90 minuta, duke fituar 4-0. Nainggolan ishte shënuesi i dy golave, por ai i realizuar në minutën e 39-të, i pari për Romën, ishte mjaft i bukur. Një top i dhuruar nga kundërshtari u gjuajt fluturimthi nga lojtari romanist jashtë zonës së 16-metërshit dhe përfundoi në rrjetë.
Shënuan gjithashtu Dzeko dhe El Shaarawy; ky i fundit po ashtu realizoi këndshëm, me një top të ngritur mbi portierin.
Roma do të ketë përballë Çezenën në çerekfinale, të vetmen skuadër të Serisë B të mbetur në Kupën e Italisë. Takimi mes tyre do të luhet më 1 shkurt.
Ndryshe këtij çifti, tre çerekfinalet e tjera sjellin përballje të forta të skuadrave më të mira italiane. Napoli e Fiorentina do të ndeshen mes tyre më 24 janar. Një ditë më pas, luhet çerekfinalja mes Juventusit dhe Milanit. Më 31 janar i vjen radha sfidës Inter – Lacio. /tesheshi.com/
